Mobilinik atuisut internettimut akileeqataasarput
Oqarasuaatinik angallattakkanut attaveqaatinik niueruteqarneq Tele-Postimut iluanaarutaavoq, Tele-Postillu taamaalilluni internettimik atuinermik niueruteqarnermini amigartooruteqarnerminut oqarasuaatinik angallattakkanut attaveqaatinik niueruteqarnermit sinneqartoorutini matussutitut atortarlugit.
Attaveqarnermut naalakkersuisup Knud Kristiansenip Atassummeersup Siumumeersup Jens-Erik Kirkegaardip § 37 naapertorlugu apeqqutaanut 18-iusunut akissuteqaataani tamanna atuarneqarsinnaavoq.
Ammanerulersitsineq amigartooruteqarfiussaaq
Niuerfimmi tassani Tele-Postimut unammillerlutik sullissinernik neqerooruteqartut nutaat taamaalillutik Tele-Postip angusinnaanngisaa angusinnaassaagunikku aatsaat iluanaaruteqarsinnaassapput. Tassalu internettimik niuerfimmi sinneqartooruteqarlutik.
Neqerooruteqartulli nutaat iluaqutissartarissavaat sutigut neqerooruteqarusunnerlutik namminneerlutik aalajangersinnaassagamikku. Taamaalillutik sumiiffiit pilerinarnerusut kisiisa toqqarsinnaassavaat, tassalu illoqarfiit anginerit immap naqqatigut kabelimut attaveqartut.
Aamma atuaruk Telep namminersortunngorsarneqarnissaanut Kalaallit Nunaat piareersimanngilaq
Unammillertulli oqarasuaatinik angallattakkanut attaveqaatinik niueruteqarnermit sinneqartoorutit atorlugit internettimik niueruteqarnerminnit amigartoorutiminnik matussusiinissamut periarfissaqassanngillat.
Misissueqqissaarinerit utaqqineqartut
Oqarasuaatinik angallattakkatigut sullissinernik ammanerulersitsinissamik pilersaarutigineqartumut tunngatillugu suli aalajangiisoqarsimanngitsoq Kristiansenip erseqqissaatigaa.
Oqarasuaatinik angallattakkatigut sullissinernik ammanerulersitsinissamik pilersaarutigineqartoq aappaagu pisussaavoq, aatsaalli inuiaqatigiit aningaasaqarneranni sunniutissanik misissueqqissaartoqareerpat pisussaassalluni.
Misissueqqissaarinerli taanna suli aallartinneqarsimanngilaq.
Aamma atuaruk Knud Kristiansen: Paasinneqqaarluta namminersortunngorsaassaagut
Knud Kristiansen oqaluttuarpoq internettimut akigitinneqartut qaffannissaat peqatigisaanillu oqarasuaatinik angallattakkanik atuinermut akigititat apparnissaat aarleqqutigineqartoq. Tamannali pinavianngitsoq erseqqissaatigaa, taamaattumillu internettimut akigitinneqartut qaffannginnissaat qulakkeerniarlugu ikaarsaarnermut najoqqutassamik suliaqartoqassasoq oqaatigalugu.
