Knud Kristiansen: Paasinneqqaarluta namminersortunngorsaassaagut

Oqarasuaatitigut angallattakkatigut attaveqarneq akikillissanersoq qularnaqqaartinnagu, namminersortunngorsaaneq aallartisarneqassanngitsoq Tele-Post, Naalakkersuisoq Knud Kristiansen Siumumeersorlu Anders Olsen taama isumaqarput.
Assi © : Nils Baum, Bureau for Inatsisartut.
apriilip 24-at 2015 14:41

Telekkut sullissinermi namminersortunngorsaaneq Nunatsinni oqallisigineqaleruttorpoq Qulaarpaamilu ippassaq ilaatigut oqallisigineqarluni.

Telekkut sullissinermi namminersortunngorsaalinnginnitsinni, oqarasuaatinut angallattakkanut attaveqaatit namminersortunngorsaanermi kingunerisinnaasat eqqartoqqaartariaqarpagut.

Taama Tele-Post, naalakkersuisoq Knud Kristiasen Siumumeersorlu Anders Olsen isumaqarput. Taakkua taamannak oqariartuuteqarput ukioq manna nittartakkakkut namminersortunngorsaanermi piffissaliussaq eqqorlugu naammassineqarsinnaanngimmat.

 Aamma atuaruk Nalunaarasuartaateqarnermik Aqutsisut Tele-Post tuavisaaraat

Taakkua pingasut telekkut sullissinermi namminersortunngorsaaneq Qulaarpaami oqallisigineqarmat ippassaq peqataapput.

Oqarasuaatitigullu angallattakkatigut attaveqarneq akikillissasoq qularnaaqqaartinnagu, namminersortunngorsaaneq aallartisarneqassanngitsoq, tamarmik isumaqatigiipput.

 

Misissuilluartoqaqqaassasoq

Telekkut attaveqaatit bredbåndi ukioq manna namminersortunngorniarlugit sulissutigineqarpoq, oqarasuaatinik angallattakkanik attaveqartitsineq aappaagu inissereersimasariaqaraluarpoq.

Sulili taakkua misissorluarneqarsimanngitsut isornartorsiuisut ilaannit oqaatigineqarpoq.

Tele-Postimi pisortap Steen Montgomery-Andersenip erseqqissarpaa iliuuseqarluartoqalinnginnerani oqarasuaatitigut angallattakkatigut attaveqarneq misissorluarneqassasoq.

-  Isumaqarpunga misissuinissarput pingaaruteqarluinnartoq, telekkummi sullissinermi namminersortunngorsaanneq inuiaqatigiit aningaasaqarnerannut iluaqutaasariaqarpoq. Pingaaruteqarporlu suut iliuuserinerlugit eqqumaffigissallugit, aalajangereerlutami kingumut qiviaqqissinnaanngilagut, Steen Montgomery-Andersen oqarpoq.

Aamma atuaruk Qulaarpaa Telemik ilisimasallip namminersortunngorsaaaniarneq “silaqanngitsuliornerunerarpaa”

Oqarasuaatikkut angallattakkatigut attaveqarneq namminersortunngorsagaassappat killeqanngitsumik atuisinnaanissaq atuutilersinnaassaaq. Piviusunngorpallu tuniniaasut nutaat 4G-imik attaveqaatilimmik nuna tamakkerlugu neqeroorsinnaalissapput. 

Siumumeersup Jens-Erik Kirkegaardip telekkut sullissinermi namminersortunngorsaanerup kingunerisinnaasaanut misissuinerit amigaatigai. Parteeqataalu Anders Olsen isumaqarpoq aamma misissuiffigineqassasut.

 

Naalakkersuisup misissuisoqarnissaa isumaginiarpaa

Attaveqaqatigiinnermut Naalakkersuisup Knud Kristiansenip oqarasuaatinik angallattakkanik attaveqartitsineq pillugu misissuisoqarnissaa isumaginiarpaa.

Misissuineq naammassippat Tele-Post namminersortunngorsaanermut aallartisarsinnaavoq tamannalu qaammatini aqqaneq marlunni pissasoq naatsorsuutigineqarpoq.

Knud Kristiansenip naatsorsuutigaa piffissaliussaq eqquutsinneqassasoq taamaasillunilu aappaagu naammassisinnaasoq.

- Telep misissuinini aallartiaarpagit, maannakkut piffissaliussarput angumerissagipput ilimangilluinnarpara, Attaveqaqatigiinnermut Naalakkersuisoq Knud Kristiansen oqarpoq.

Demokraatineersup Randi Vestergaard Evaldsenip misissuinissaq akuerinngilaa.

Aamma atuaruk Qulaarpaa Kisermaassisoqarunnaarnera Nunatsinni timmisartuussisarnermik akikinnerulersitsissaaq