Qulaarpaa Kisermaassisoqarunnaarnera Nunatsinni timmisartuussisarnermik akikinnerulersitsissaaq
Angallannermut naalakkersuisup nunatta iluani timmisartuussisarnikkut unammilleqatigiittoqalernerata nunatsinnut iluaqutaanissaa qularutiginngilaa.
- Angalasunut akikinnerulernissaa naatsorsuutigilluinnarpara, marlunngormat tusagassiortunik katersortitsigami taama oqarpoq.
Akikinnerulernerata saniatigut Knud Kristiansenip aamma naatsorsuutigaa angallannikkut nalinginnaasumik pitsanngoriaateqartitsissasoq aammalu takornariat tikisinniarnissaat ajornannginnerulissasoq.
AAMMA ATUARUK Aluu Airlines timmisartornerup akikinnerulernissaanik neriuuteqalersitsivoq
Billetsit akikinnerusut
Tamannarpiaq tunngavigalugu Danmarkimi Angallannermut Aqutsisoqarfimmut inassutigaa Greenland Express aamma Aluu Airlines nunatta iluani aammalu nunatsinnit nunatsinnut timmisartuussinissamut akuerineqassasut.
Greenland Expressip pisortaata Gert Braskip qularinngilluinnarpaa Air Greenlandimit akikinnerusumik billetsinik neqerooruteqarsinnaassalluni.
- Nunatta iluani timmisartuussinermi kisermaassisoqarunnaarnera atuisartunit annertuumik malugineqarnissaa qularutiginngilluinnarpara, Gert Bask oqarpoq.
AAMMA ATUARUK Greenland Express nunatta iluani timmisartuussisinnaanngortoq
Air Greenland kimigiiserfiginiaraa
Timmisartortitseqatigiiffiup siorna aallartinnerliornera ilinniarfigisimallugu oqaatigaa, aammalu Greenland Expressip timmisartortitseqatigiiffik anginerumaartoq Air Greenland kimigiiserfigisinnaassallugu naatsorsuutigaa.
- Uagut allat aallartisarutta iliuuseqaratik isiginnaaginnarnissaat takorloorsinnaanngilara.
- Akigititatik aamma akikillissavaat, tamannarpiaavorlu suliniutigisama siunertarisaa.
Upernaviup Paamiullu akornanni aallaqqaasiutitut timmisartuussisarniarpoq.
Timmisartortitseqatigiit nutaat Air Greenlandimit ilassilluarneqarput.
- Isumaqarpugut unammilleqatigiinneq pitsaasuullunilu tulluartuusoq. Nikalluussinaveersaartitsisuuvoq, pisortaaneq Michael Højgaard taama oqarpoq.
Akikinneqqusaannissamut piareersimapput
Air Greenlandip nunatta iluani timmisartuussinermi akigititat ilaannik akikillisitsisariaqarsinnaanera aamma tunuartivissunngilaa.
- Akikinnerungaatsiartumik neqerooruteqartoqarpat, tamanna unammillernertut tigullugu immitsinnut aperissaagut allaanerusumik pitsaanerusumillu iliorsinnaanerluta. Taamaammat soorunami naleqqussaassaagut.
Michael Højgaard isumaqanngilaq unammilleqatigiinneq Air Greenlandip nuna tamakkerlugu sullissinissaanut sunniuteqassasoq.
Ukiuunera akisussaaq
Unammillertilli aasaaneraniinnaq timmisartuussisassappata tamanna Air Greenlandimut akisusinnaavoq.
- Naatsumik oqaatigalugu, Air Greenland ukiuunerani amigartooruteqarfiusumik timmisartuussisarpoq. Aasaaneranilu timmisartuussisarnitsigut sinneqartoorutaasoq atorlugu tamanna matussusertarparput, Michael Højgaard nassuiaavoq.
- Unammillertigisarput aasaaneraniinnaq timmisartuussisassappat aasaanerani aningaasanik isaatitsiniarnitsigut ajornartorsiuteqalissaagut. Tamatumalu ukioq kaajallallugu timmisartuussisinnaanissarput ilungersunartunngortissinnaavaa, pisortaaneq taama naggasiivoq.