Nalunaarasuartaateqarnermik Aqutsisut Tele-Post tuavisaaraat
Nalunaarasuartaateqarnermik Aqutsisut nalunaarasuartaateqarnermi sullissinermik namminersortunngorsaaniarnermut naatsorsugai kingulliit naammassitinniarlugit Tele-Post tuavisaarpaat.
Nalunaarasuartaateqarnermi sullissineq pilersaarutaagaluartutut ukiup aallartinnerani naammassineqanngitsoormat, apriilip aallaqqaataanut tamanna kinguartinneqaraluarpoq.
Aamma atuaruk Oqarasuaatit angallattakkat internetsilu akikitsut Telep aqutsisuisa upperaat
Ilimaneqartutulli namminersortunngorsaaniarneq suli maannamut naammassineqanngilaq.
Nalunaarasuartaateqarnikkut sullissisut allat Telep atassuteqarfiata atornissaanut qanoq akiliissanersut siunnersortit Tele-Post sinnerlugu naliliisussaagaluarput. Siunnersortilli akisuallaarneri pissutigalugu suliaat suli naammassinngitsut taakku soraarsitaapput.
Tamatuma kingorna Tele-Postip akit nammineq nalilernissaannut piffissaqartinneqarpoq.
Tele-Postilli suliniarnera arriippallaarnerarlugu isornartorsiorneqarmat, Nalunaarasuartaateqarnermik Aqutsisut namminneq akinik nalilersuiniarlutik aallartiinnarput.
Aamma atuaruk Internetti akikinnerulissappat avinngarusimasormiut minitaasinnaapput
Naammassipallanniarput
Nalilersornerisalu naammassiaarnissaat Nalunaarasuartaateqarnermik Aqutsisuni pisortap Nicolai Odgaard Jensenip naatsorsuutigaa.
- Akinik naatsorsuinerup sukkasuumik naammassinissaanut pimoorussilluta tamanna sulissuteqarpugut, suliassamillu isumaginninneq Tele-Post ingerlatsisullu suleqatigalugit sukkasuumik ingerlanneqassaaq. Akinik naliliinitta naammassinnginnerani Tele-Postimit allaanermik aalajangiisoqassanersoq oqaatigisinnaanngilara. Utaqqiinnarsinnaanngilagulli, Nicolai Odgaard oqarpoq.
Nalunaarasuartaateqarnermik sullissisut allat Tele-Postimut piffissaliussap allanngoqattaarnera pillugu naammagittaalliuuteqarnerat Nalunaarasuartaateqarnermik Aqutsisut namminneerlutik akinik nalilersuiniarnerannut pissutaavoq. Naammagittaalliortoqarsimatillugulu Nalunaarsuartaateqarnermik Aqutsisut akuliussinnaasut, Nicolai Odgaard Jensenip oqaatigaa.
Nalunaarasuartaateqarnikkut attaveqaatit namminersortunngorsarneqarnissaat Qulaarpaami unnugu sisamanngornermi kalaallisut 19:30 qallunaatullu 20:30 KNR-TV-kkut sammineqassaaq.