Internetti akikinnerulissappat avinngarusimasormiut minitaasinnaapput
Avinngarusimasuni innuttaasut telekkut sullissinermi namminersortunngorsaasoqarpat akikinnermik aammalu atoruminarnerusumik internetteqalersinnaagunanngillat.
Tassami internettimik attaveqalersitsineq Tele-Postiunngitsumut illoqarfinni minnerni pisariullunilu akisuallaassasoq, telekkut attaveqarnermut tunngasunik siunnersuisartoq naliliivoq.
Kalaallimmi tamarmik Naalakkersuisut telekkut sullissinermi namminersortunngorsaanerat iluaqutiginavianngilaat.
Avinngarusimasuniittut telekkut sullissinermi namminersortunngorsaanermi eqqornerlunneqarsinnaapput.
Aamma atuaruk Akikinnermik internetseqalernissaq piviusunngunngikkallalertoq
Pisisartut ikippallaartut
Attaveqaqatigiinnermut aqqutit amigarnerat aammalu pisisartut ikippallaarnerat internettimik attaveqalersitsisartunut pilerilersinngitsoorsinaapput. Innuttaasullu taamaasillutik akikinnermik sukkanermillu internetteqalernissaq puiguinnarsinnaavaat.
Telekkut attaveqarnermut tunngasunik siunnersuisartoq Torben Rune suliffeqarfimmit Netplanimeersoq, taama naliliivoq.
-Tamakkunani telekkut attaveqaatinik atuisut Danmarkimi inoqarfinni inukinnerpaaniilluunnit immaqa imminnulluunniit ungasinnerullutik najugaqartiterput. Taamaammat tamakkunani attaveqaatinik namminersortunngorsaagaluaraanni attaveqarnissarluunniit ilimanaatikittuararsuuvoq. Neqerooruteqartarumaartut nutaat Tele-Postimut sumiiffiinni taamaattuni unammilerusussinnaanissaat takorlooruminaatsippara, Torben Rune oqarpoq.
Telekkut sullissinerup namminersortunngorsarnerani pissarsisussat siullermik tassaassapput illoqarfinni anginerni innuttaasut, soorlu Nuummeersut, Sisimiuneersut Qaqortumeersullu. Taakkunanimi illoqarfinni innuttaasut amerlammata atortulersornissamullu pisariaqartitsineq mikinerummat unammilleqatigiinnissaq ajornannginnerusoq, Torben Rune naliliivoq.
Sullissineq namminersortunngorsarneqareerpat, nunatsinni avinngarusuniittut Qallunaat Nunaanni avinngarusimasuniittutuut akisunermik aammalu attavilunnermik attaveqaateqalissasut, taanna isumaqarpoq.
Aamma atuaruk Politikerit Tele-Post pillugu kamattut
Nalilissallugu siusippallaartoq
Taamali ajortigisariaqanngitsoq Christian Jelvelund Copenhagen Economic-imi siunnersorti oqarpoq. Taanna Telekkut sullissinerup namminersortunngorsarnissaanut piumasaqaatinik sinaakkutaasussanik allaqataasimavoq.
Siunertaavormi, nunap ilaani, internettimik neqerooruteqartartut nutaat imminut akilersinnaanngitsutut isigisaanni, attaveqarnerup attatiinnarnissaanut neqerooruteqartartut nutaat Tele-Postimut akiliisassasut.
-Akiuliut taanna attaveqarnissamik neqerootuteqartunik nutaanik takkuttoqanngeratarsinaaneranut atorneqassaaq. Tassa taamaalilluni assersuutigalugu Tele-Postimut akiluteqartarnikkut, avinngarusimasuni suli attaveqarnissaq qulakkeerneqassaaq, Christian Jelvelund oqarpoq.
Avinngarusimasunut akisunerulissanersoq nalilissallugu Christian Jelvelundip siusippallaarsoraa.
Aamma atuaruk Knud Kristiansenip Tele-Post sunianngilaa
