Knud Kristiansenip Tele-Post sunianngilaa

Attaveqarnermut naalakkersuisup Knud Kristiansenip telekkut sullissinermi namminersortunngorsaanerup kinguartinneqarnera ilisimasimavaa, Inatsisartunulli ilisimatsitsissuteqarsimanngilaq.
Karl-Kristian Kruse, Knud Kristiansen, Anda Uldum & Kim Kielsen Assi © : Nils Baum, Bureau for Inatsisartut
apriilip 09-at 2015 14:40

Ullut marlussuit nipangeersimareerluni attaveqaqatigiinnermut naalakkersuisoq Knud Kristiansen telekkut sullissinermi namminersortunngorsaanerup kinguarnera kiisami oqaaseqarfigaa.

Kinguartoorneq naalakkersuisup ilisimasimavaa, tamannali Inatsisartunut ilisimatsitsissutigisimanagu.

          Aamma atuaruk Comby Tele-Postimut: Eqeerniaritsi

Tele-Postip siunnersortiminut aningaasartuutai ingasappallaamik amerliartorsimammata, Tele-Post telekkut sullissinermik namminersortunngorsaaneq kinguartinneqarpoq.

Attaveqaatininngaanniit allannit internetteqalereersinnaassussaagaluarputit, tassami apriilip aallaqqaataani tamanna atuutilertussaagaluarpoq.

Aningaasartuutilli amerliartuinnartut tamanna piviusunngunngitsoortippaat. Taamaammallu politikerit, soorlu Atassummeersoq Steen Lynge aamma Demokratineersoq Justus Hansen kamapput.

Taakku Tele-Post politikkikkut sulinermut akulerunnertut taavaat aammalu attaveqaatinik niuffannerup aammanerulersinnissaa piaaralutik kinguarsaraat unnerlugu. 

 

Nassuiaatissartaqartoq

Inuit Ataqatigiit politikkikkut oqaaseqartartuat Naaja Nathanielsen politikerit tamatuminnga paasitinneqarsimannginnerannut tupigusuppoq.

- Kinguaattorneq tusagasiutitigut tusareeratsigu inatsisartut paasissutissinneqassasut naatsorsuutigaara. Naalakkersuisut tullinnguullugu qanoq iliorniarnerlutik oqaluttuutissagaatigut piumasaraarput. Naalakkersuisoq akissuteqassasoq naatsorsuutigaara, Naaja Nathanielsen oqarpoq.

Tamannali nassuiaatissartaqartoq attaveqaqatigiinnermut naalakkersuisoq Knud Kristiansen oqarpoq.

Knud Kristiansenimmi ilisimareersimavaa Tele-Post kinguaattoorsinnaasoq, qanorli kinguaattoortoqartigissanersoq nalunartikkamiuk, politikerit kalerrissimanagit oqaluttuarpoq.

- Tassa uani nalunarsimavoq qaqugu qanorlu taanna ersarissumik takusinnaasimanngilarput, Knud Kristiansen oqarpoq.

 

Naalakkersuisoq suliaq pillugu iliuuseqarusunngikkallartoq

Attaveqaatinik niuffannermik suliaqartut nutaat Tele-Postip attaveqaataanik attartornerminni qanoq akiliisassanersut aammanerulersinnissaa unitsinneqarpoq, Tele-Postip nammineeerluni paasiniartussaasimavaa. Tassanilu siunnersortinut aningaasartuutit amerliartuinnarmata ajutoortoqarmat unikaallattariaqalertut, Tele-Post KNR-mut allappoq

Aamma atuaruk Akikinnermik internetseqalernissaq piviusunngunngikkallalertoq

Steen Lynge paragraf 37-ikkut Naalakkersuisunut apeqquteqaateqarsimavoq Naaja Nathanielsenillu Knud Kristiansen iliuuseqaqquaa.

Knud Kristiansenili Tele-Postimit pasissutissinneqartingani suliaq pillugu iliuuseqarusunngilaq.

- Isumaqarpunga piaarpallaartoq maannamut taakkua isummerfiginissaanut, attaveqaqatigiinnermut naalakkersuisoq oqarpoq.

Suliap naammassiniarnissaanut piffissalussassamik maanna inissiiniartoqartoq, Tele-Post radioavisimut ilisimatitsivoq.