Comby Tele-Postimut: Eqeerniaritsi
Qarasaasiaqarnermut sullissinermik suliffeqarfiup pisortaa isumaqarpoq, kinguaattoorneq politikkikkut aalajangikkanut akerliusuusoq.
Suliffeqarfillu Comby internettimik neqerooruteqarnerulerusuttunut ilaasoq, nunatsinni telekkut sullissinermi peqataanerorusukkaluartoq, utaqqeqqaartussanngormat Brian Torp pakatsisimaarpoq.
Internettikkut attavimmik apriilip aallaqqaatanit tuniniaalertussaagaluarpoq, Tele-Postili suli piariinngimmat tuniniaalernissaa kinguarpoq.
Tele-Post ataqqinninnerusariaqartoq
Internettikkullu aqqutinik kikkulluunniit tuniniaasunngorsinnaanerat Tele-Postip kinguartikkamiuk inuit qinigaasa aalajangiinerannut akerliusumik iliortut, Brian Torp isumaqarpoq.
- Tele-Post eqiinganerusariaqarpoq taavalu isumaqatigiissutinut inatsisinullu ataqqinninnerusariaqarluni tuniniagassanilu isumaqatigiissutigineqareersutut tuniniarlugit, Brian Torp oqarpoq.
Aamma atuaruk Akikinnermik internetseqalernissaq piviusunngunngikkallalertoq
Tele-Postip siunnersortiminut aningaasartuutini ingasappallaamik amerliartorsimaneri, kinguaattooqattaarnermut Tele-Postip nammineq pissutaatippaa. Internettimut atassusiisartut nutaat Tele-Postip attaveqaataanut attavininnermikkut qanoq akiliisassanersut siunnersortit taakkua nalilersortussaavaat.
Internettikkut attaveqarnermik tuniniaasartussat nutaat soorlu Combytut ittut innuttaasunut internettimik tuniniaaniarunik Tele-Postip attaveqatai atareertut attartorfigisussaavaat.
Kisitsinerilli takutippaat tamanna piviusunngorallarunnanngitsoq.
Attaveqaatinik attartornermut akigititassat naatsorsorneri Brian Torpip utaqqeeqqaartariaqassavai.
Aningaasartuutimmi amerliartuinnavissimammata Tele-Postip siunnersortini soraarsittariaqarsimavai. Taamaammat akit qanoq ikkumaarneri suli aalajangersorneqanngillat, aammalu Brian Torp Combylu utaqqisariaqassallutik.
Naalakkersuisoq iliuuseqartariaqarpoq
Brian Torp isumaqarpoq, attaveqarnermut naalakkersuisup, Knud Kristiansenip telekkut sullississutinik neqerooruteqartartut maalaarnissamut periarfissaat pitsaanerulersittariaqarai:
-Telekkut sullineqarneq pillugu maalaartarfiup pilersineqarnissaa ukiorpassuit qaangiuttut aalajangerneqarpoq, isumaqarpungalu taanna pilersineqartariaqalertoq. Uagullu tuniniaasartuusugut maalaarfissaqalerniassagatta, Naalakkersuisoq nukingerluni tamatuminnga isumaginnissasoq isumaqarpunga, Brian Torp KNR-imut oqarpoq.
Tele-Postip atortortorissaaarutiminik attartornermut akigititassaminik aalajangersaaniarluni sulileruttortoq, suliffeqarfik taanna Radioavisimut allappoq.
Naalakkersuisoq Knud Kristiansen aamma Tele-Postimi pisortaanerugallartoq, Steen Montgomery-Andersen ullumi oqaaseqarusunngillat.
