Akikinnermik internetseqalernissaq piviusunngunngikkallalertoq
Tassami internettimut atassusiisartuniit allaniit internettimik pisinissamik periarfissaqalissanngikkallarpoq, naak tamanna apriilip aallaqqaataani periarfissaalertussaangaluartoq.
Telekkut sullissinermik naminersortunngorsaaneq taamaalilluni suli kinguaqqippoq, qaqugu piviusunngonissaa maanna ilisimaneqarani.
Aningaasartuutit amerliartorsimapput
Kinguaattoornermut pissutaavoq Tele Postip siunnersortinut aningaasartuutai ingasappallaamik amerliartorsimammata. Internettimut atassusiisartut nutaat Tele Post-ip attaveqataanut attavininnermikkut qanoq akiliisassanersut siunnersortit taakkua nalilersortussaasimavaat. Internettimummi atassusiisartut nutaat Tele-Post-ip attaveqatai atorlugit aatsaat atassusiisinnaapput.
Aamma atuaruk Ungasinngitsukkut pitsaanerusumik akikinnerusumillu Internettertoqarsinnaalissaaq
Tele Post-ip siunnersortilersorneq aningaasartornarsiartuinnarmat unitsissimavaa.
Tassalu internettimut atassussiisussat telemut qanoq akiliisassanersut Tele-Post-ip aaliajangersorsinnaajunnaaqqavaa.
Sulissuteqartoq
Tele-Post Namminersorlutik Oqartussanut Nalunaarasuartaateqarnermullu Aqutsisunut nalunaarsimavoq, ulloq piffissaliussaq eqqorlugu atuutsilersitsisinnaanatik. Tele Postillu attaveqatigiinnermut atortorissaarutiminik atuinermi akiusussanik maanna inissiiniarluni sulissuteqarpoq. Qaquguli suliap naammassinissaa oqaatigissallugu siusippallaarpoq.
Attaveqarnermut Naalakkersuisoq Knud Kristiansen kiisalu Tele-Post-imi pisortaangallartoq Steen Montgomey-Andersen oqaaseqartinniaraluaratsigit iluatsinngilarput.
