Ungasinngitsukkut pitsaanerusumik akikinnerusumillu Internettertoqarsinnaalissaaq
Peqqissutsimut Attaveqarnermullu Naalakkersuisoq Steen Lynge naapertorlugu, naligiimmik atugassaqarfiusumik unammilleqatigiinnissaq qulakkeerneqassaaq.
- Sumiiffinni unammilleqatigiinnissamut tunngavissaqarfiusuni nalunaarasuartaateqarnermut ingerlatseqatigiiffiit sullitassat pillugit imminnut unamminerisa, innuttaasunut inuussutissarsiortunullu nuannaarutaasumik tunisassianik neqerooruteqarneq annertusitissavaat aammalu akigititat tatisimaneqartuaannalersissallugit, Steen Lynge erseqissaavoq.
Internettimik nioqquteqarnerup ilaa 2009-mili ammanerulersimasoq, taassuma innersuussutigaa, taamalu ineriartorneq internettimik nioqquteqarnerup tamakkiisumik ukioq manna ammaanneqarneratigut ingerlaannassaaq. Aammattaaq oqarasuaatinut angallattakkanut attaveqartitsinermik isertitsilluaataasartumik suli ammanerulersitsineq iluaqutaassanersoq, ukiuni aggersuni misissorneqassaaq.
Nalunaarasuartaateqarnermut Aqutsisoqarfik nalunaarasuartaateqarnermi atortulersuutinik niuernermik nakkutiginnittuuvoq, soorluttaaq tassanngaanniit naligiimmillu atugaqarluni unammilleqatigiittoqarnersoq nakkutigineqarluni.
Assersuutigalugu TELE-POST-ip naatsorsuutaasa aggulunneqarnissaat pillugu maleruagassanik Naalakkersuisut aalajangersaapput, taamaalillutik ulluinnarni atugassanut tunngasunut aamma amerlasuukkuutaartunik pisiniartarnermut niuerfik immikkoortinneqarlutik.
- Nunamili sumiiffiit ilaanni nalunaarasuartaateqarnermi kiffartuussissutinik niuernermik tunngaveqartumik neqerooruteqarnissaq ajornartussaavoq. Taamaattumik niuerfimmi ammanerulersitsineq kisimiitinneqarsinnaanngilaq, Steen Lynge erseqqissaavoq.
Taamaattumik sumiiffinnut niuernermik tunngaveqartumik ingerlatsiviusinnaanngitsunut annertusaanissamut aningaasalersuineq karsimik ataatsimoorussamik pilersitsinikkut pissaasoq oqaatigaa. Karsilu taanna ataatsimoorussaq nalunaarasuartaatileqatigiiffiit tamarmik nammaqatigiittumik akilersueqatigiiffigissavaat.
Naalakkersuisut anguniagaraat, illoqarfinni nunaqarfinnilu innuttaasut tamarmik 2018-imi 10 Mbit/s pallillugu sukkassusilimmik internettersinnaassasut. Tassa ullumikkut sukkassutsimut aallaaviusut 2,5-eriaataanik. Aamma innuttaasut 80 %-ii 30Mbit/s-imik atuisinnaassapput.
