Qulaarpaa Oqarasuaatit angallattakkat internetsilu akikitsut Telep aqutsisuisa upperaat

Telemi namminersortunngorsaasoqarpat internetsi akikinnerulissaaq pitsaanerulerlunilu, Telemi aqutsisut taama naliliipput.

Tele namminersortunngorsarneqarpat nunatta annersaani internetsi akikinnerulerlunilu pitsaanerulissaaq, Telemi aqutsisut nakkutiginninnermi attuumassuteqanngitsuusut taama naliliipput.

Suliffeqarfiit pingasuusut ilaat Inu-IT nunatsinnut internetsimik oqarasuaatinillu angallattakkanik neqerooruteqarusuppoq. Internetsimik pilersitsinissaminnut ukioq manna suliniuteqarniarput, tullissaanilu pilersaarutit malillugit internetsimik neqerooruteqarniarlutik. Neriorsuutigaat atuisut tamanna nuannaarutigiumaaraat.

- Akinik appasinnerpaanik takorusuppugut, pingaartumik oqarasuaatinik angallattakkanik. Isumaqarpungami tamakkununnga akiliivallaartartugut, tassanilu TELE aningaasarpassuarnik iluanaaruteqartarpoq, Martin Gjødvad, Inu-IT-mi pisortaq oqarpoq. 

Toqqagassarpassuit

Telemi aqutsisut oqaatigisinnaanngilaat qanoq akinik appaatigisoqassanersoq, pisiassalli akikinnerulissasut amerlanerulissasullu oqaatigaat.

-  Pisiassat toqqagassallu amerlanerulerneri atuisut malugiumaaraat ilimagaara, Nicolaj Odgaard Jensen Telemi aqutsisuni pisortaq oqarpoq.

Telep namminersortunngorsarneqarnissaa Telemi misissueqqissaartartup John Strandip  isornartutut isigaa. Kisianni Telemi aqutsisut qularutiginngilaat innutaassut tamanna nuannaarutigiumaaraat. 

Atuisut amerlanerulerpata akit appasinnerulissapput

Nunatta annersaani søkabelimit radiokædemillu pilersorneqartut akit apparneri malugiumaaraat, Nicolaj Odgaard Jensenip nalilerpaa.

Atuisut amerlanerulerpata, internetsi akikinnerulissaaq, Nicolaj Odgaard Jensen oqarpoq.

Namminersortunngorsaanermut aqqut siullersaat 2009-mi ingerlanneqarpoq. Tassani internetsi aqquteqanngitsoq, tassa trådløsi pilersinneqarpoq. Tamannalu Nuummi suliffeqarfiit malugaat, maannalu inuit ataasiakkaat atulernikuullugu.

Flatrate arlalinnut iluaqutaavoq

Tamatta internetsi sukkanerusoq akikinnerusorlunniit malugisimassavarput. Tamanna 2009-mi namminersortunngorsaanissamik aalajangernerup malitsigaa, Nicolaj Odgaard Jensen naqissusiivoq.

Qaqortumi Nuummilu flatratimik atuinerup søkabili annertusissimavaa, atorluarneqarnerulersimallunilu. Taamaaliornikkullu nunatta annersaani akinik appaanermik kinguneqarsimalluni.

Isummersuutit


 

Pages