Angerlarsimaffimmit sulisartut ammanerulersitsinermi eqqugaassapput
Lan linkimut akit qaffattussaanerat pissutigalugu angerlarsimaffimmi sulissalluni akitsoriarujussuassaaq.
Lan linkilli ungerutissiat kanngussat marluk aqqutigalugit internetituulli ingerlammata, Telelu akiviusut naapertorlugit akigititaqassaguni internetimut akit aamma qaffassasut ilimagineqarsinnaagaluarpoq.
Politikerilli internetimut akinik qaffaasoqarnissaa akerleraat, taamaammallu attaveqaatit assigiinngitsut tapeqatigiittarnissaat akueralugu, taamatullu oqarasuaatinit angallattakkanit isertitat atorlugit internetimut akit appasitsinneqarlutik.
Lan linkimut akit qaffanneqartussaaneri suliffeqarfinnut anginernut, soorlu Dronning Ingridip Napparsimmavissuanut eqquissaaq, napparsimmaviup nakorsai peqqissaasuilu amerlasuut angerlarsimaffimmininngaanniit sulisarnerat pissutigalugu.
525 koruuninik qaffassaaq
Lan linkimik 4/Mbitimik sukkassusilimmik atuineq siornatigut 250 koruuninik akeqarpoq. Akilli aningaasartuutillu naapertuunnginnerat pissutigalugu, akiviusut maanna tunngavigineqalerput, Lan linkimullu akit 750 koruuninut oktobarip aallaqqaataanit qaffanneqartussanngorlutik.
- Taakkununnga akit siornatigut appasippallaarsimaneri nassuerutigisariaqarparput. Nioqqutiginissaannullu akit pillugit naatsorsuinissamut maleruagassiat najoqqutaralugit Lan linkip akii qaffangaatsiartariaqarsimavagut, TELE-POST-imi pisortaagallartoq Søren Lennert Mortensen oqarpoq.
Ungerutissiat kanngussat marluk aqqutigalugit Telep Lan linkimut aningaasartuutai, akinit nutaanit matussuserneqassapput.
Aamma atuaruk Mobilinik atuisut internettimut akileeqataasarput
Ungerutissiallu kanngussat taakku marluk internetimut naliginnaasumillu telefoneqarnermut aamma atortarput. Taamaammat internetimut aki aamma qaffassasorineqarsinnaassaaq.
Interneteqarnerli akitsussanngilluinnartoq, Telemi pisortaagallartoq oqarpoq.
- Internetimut akit qaffanneqaqqusaanngitsut Naalakkersuisut aalajangernikuuaat. Taamaammat akitsuinissatsinnik periarfissaqanngilagut, Søren Lennert Mortensen oqarpoq.
Akerleriittoqarsinnaavoq
Taamaalilluni Tele akiviusut tunngavigalugit interneteqartitsisussaagaluartoq, akiviusullu naapertorlugit internet akisunerusussaasorineqaraluartoq TELE akinik qaffaasinnaatitaanngilaq.
Tamanna akunnattoorfeqartoq, Søren Lennert Mortensenip aamma nassuerutigaa.
- Politikerinut taanna apeqqutigisariaqassavat. Tassani akerleriittoqarsinnaarpasippoq, uagulli akinik qaffaaniarnata aalajangernikuuvugut, Søren Lennert Mortensen oqarpoq.
Attaveqarnermut naalakkersuisoq, Knud Kristiansen, suli pissarsiarisinnaasimanngilarput.