LGBTQ+-peqatigiiffiit: Inatsisitaaq oqaluttuarisaanermut pingaaruteqaraluarluni amigaateqartoq

Kalaallit Nunaat assigiinngisitsinnginnissaq pillugu siullermeersumik inatsiseqalilerpoq.

Naligiissitaaneq assigiinngisitsinnginnissarlu pillugit Inatsisartut inatsisaannut siunnersuutip siunertaraa, kikkulluunniit pisinnaatittaaffiisa periarfissaqartitaanerisalu naligiissintaanissaat. Uanilu immikkoortitseriaatsit 18-it pineqarput, ilaatigut kinguaassiutitigut sumut sammiveqarneq, suiaassutsikkut kinaassuseq, suiaassutsikkut isikkoq aamma suiaassutsikkut ilisarnaatit.

Tamannalu suiaassutsikkut allatigullu allaanerussuteqartut nunatsinni peqatigiiffiata Greenland+-ip siulittaasuata, Sofus Fenger Hovep nuannaarutigeqaa:

- Inatsit oqaluttuarisaanermut ilaalerpoq, oqarpoq nangillunilu:

- Nuannaarutigeqaarput, maanna illersukkanut ilanngutissagatta, tassami assigiinngisitsinnginnissaq pillugu inatsimmut suiaassutsikkut immikkut sammivillit kinaassusillillu uani ilanngunneqarput.

Taamatuttaaq nunatsinni kinguaassiutitigut allamut sammiveqartut aamma suiaassutsikkut immikkut kinaassusillit nunatsinni peqatigiiffiata aappaa LGBTQ+- kattuffillu Sipineq+ nuannaarpoq.

- Siunnersuut nutaaq assut nuannaarutigaarput. Uagummi isitsinni suiaassutsit tassaannaanngillat angut arnarlu. Aamma suiaassutsikkut immikkut sammivillit kinaassusillillu aamma allat maaniipput, Sipineq+-mi siulittaasoq, Qillaq Olsen oqarpoq.

Naligiissitaanissamut aalajangiisartut

Inatsisissatulli siunnersuut LGBTQ+-kattuffimmit kukkuneqarnerarneqarpoq.

Greenland+-mit amigaataasutut isigisarput tassaavoq, naalakkersuisut assigiinngisitsinnginnissaq pillugu inatsit akuerineqarpat, qanoq iliorluni inatsisitut atuutilersinniarnerata paasinissaa.

- Inatsisissatut siunnersuut akuerisaareeruni inuiaqatigiinni ilisimaneqarnerulernissaanik eqqartuussivinnilu eqqumaffigineqarnerulernissaanik suliniartoqanngippat annilaangassutigisinnaavarput susoqannginnissaa, taakkumi isumagineqanngippata inatsit sunniuteqarnersoq maluginaviannginnatsigu, Sofus Fenger Hove oqarpoq.

Sipineq+-p siulittaasua, Qillaq Olsen, isumaqarpoq, inatsisitaap inunnut tamanut atuuttuunermigut inuttut pisinnaatitaaffeqarneq inunnit tamanit paasineqaleruni iluaqutaassasoq - inunnut LGBTQ+-mik taaneqartartunuinnaq iluaqutaanani. Assi © : Teitur Larsen.

Inatsimmik pilersitsinerup saniatigut Naalakkersuisut maalaartarfimmik - Naligiissitaanermut aalajangiisartunik - pilersitsiniarput.

Naligiissitaanermut aalajangiisartut tassaassapput inatsisinik assigiinngitsunut sammivilinnik ilisimannittut, taakkuussallutillu illit suliassanngortitannik naliliisussat.

Inatsisinik unioqqutitsinerusimappat, soorlu sulisitsisunnit immikkoortitaasimaguit, taarsiivigineqarsinnaanersutit aamma naliliiffigisinnaavaat.

- Paasigatsigu eqqarsarpugut, aalajangiisartut immikkoortitaagutta allaffigisinnaasagut pilersinneqassapput, kisianni suleriaaseq qanoq ikkumaarnersoq paaserusupparput, taanna amigaatigigipput, Sofus Fenger Hove oqarpoq.

Pitsanngoriarfissaqartoq

Peqatigiiffiit marluusut, internetikkut attaveqaatitigut eqqunngitsumik pineqarsimasut inatsimmi amigaatigaat. Immikkoortitsinerit internetikkut inuit attaveqartarfiini pisartut uani eqqarsaatigineqarput.

- Takugajupparpummi, LGBTQ+-mi inuit pineqartut internet aqqutigalugu immikkoortittaaneq misigisaraat, Qillaq Olsen Sipineq+-meersoq oqarpoq.

Sofus Fenger Hove isumaqataavoq.

Pride - suliaaqatigiit, suiaassutsimikkut allaassusillit allallu ataatsimuualaarlutik naapeqatigiittarfiat Nuummi juulimi aaqqissuunneqareersoq Greenland+ ilaatigut Facebookimi quppernerminni saqqummiussaqaramik delte Greenland+ blandt andet på deres Facebook-side uumissuerpalaartunik allattoqaqattaarsimavoq allaallu allaffigineqarsimallutik.

Ilaatigut imaattumik: ”føj for helvede, klamme homoer i fortjener ikke en skid” (sangatassuit, homopalaat, sunnguamilluunniit iluanaarfeqartariaqanngilasi).

Naak inatsisitaaq internet atorlugu inunnik allanik assigiinngisitsinerit aamma iluuseqarfiginissaannik ilaqanngikkaluartoq, inatsisissatut siunnersuummi ilaanngimmat Sofus Fenger Hovep paasisinnaavaa.

Taamaattumik siunnersuut nuannariinnarpaa, kisianni suli LGBT+-inuit internetikkut kanngunarsarneqarnerminni pinerluttuliorfigineqarsimasutut allatulli inatsisitigut illersorneqarsinnaalertariaqartut oqaatigaa.

- Piffissanngorumaarpoq, internetikkummi kanngunarsaasoqartillugu inatsit illersuutissaq pilersinneqassaguni kinguneqartussamillu inerneqassaguni, suliassaq imaannaanngitsuussaaq, oqarpoq.

Inatsisissatut siunnersuut oktobarip 18-iani aappassaaneerneqassaaq oktobarillu 25-ami naggataarneqassalluni.