Labansen Erik Jensenip tunuarnera pillugu: Tupaallannanngilaq

- Isumaqarpunga tupaallannanngitsoq imatut paasigakku oqalunnerani; Siulittaasorput matoqqavallaaqaaq.

Taama oqarpoq politikkikkut pisunik malinnaasoq Martha Labansen Erik Jensenip naalakkersuisutut tunuarnera pillugu.

AAMMA ATUARUK Tusagassiuutit: Erik Jensen naalakkersuisuujunnaalerpoq

Erik Jensenip Siumup gruppia tunuarnissaminik ippassaq sisamanngornermi ilisimatippaa, naalakkersuisutullu atuunnerminit ullumi tunuarluni KNR-imut oqaatigaa.

Siumumeersut arfineq-marluk ukiup affaata matuma siorna siulittaasuminnut tunuaqqusipput, taakkunani Naalakkersuisunut ilaasortaq ataaseq ilaavoq, tassalu Erik Jensen.

Siulittaasup tulliata aqutsisut isornartorsiorai

- Massakkut uuma pinnginnerani Karl Kristian Kruse Siumumi siulitaasup tulliatut nalunaaruteqarpoq naalakkersuisut politikkiat isumaqatiginagu, Martha Labansen oqarpoq.

Karl Kristian Krusep ullualuit matuma siorna naalakkersuisunut isornartorsiuinermini naalakkersuisut avannaani qaleralinniarsinnaanermut akuersissutinik tunniussaqaqqinniannginnerat ilaatigut iluarinagu oqariartuuteqarpoq.

Isumaqatigiinngittoqarneratalu kinguneranik Karl Kristian Krusep politikkikkut aqutsinermi peqataaginnassanerluni maanna isumaliutigileqqavaa.

AAMMA ATUARUK Kielsenip Siumumi siulittaasuata tulliata Naalakkersuisut isornartorsiorai

- Tassani malunnarpoq assigiinngitsutigut Siumup iluani isumaqatigiinngittoqartoq suna aqqutigalugu politikkip ingerlanneqarnissaa pillugu, Martha Labansen oqarpoq, nangillunilu:

- Malunnarami politikkikkut nalilersuinerit imaattartut; Una, partiit talerpilliunerusut, amerlanerussuteqarnitsinni akuusut, isumaannut akuersaarutaasinnaammat, taanna ingerlaffiginiartigu.

- Immaqa nammineerlutik partiip iluani allamik isummersuuteqaraluarlutik allatut ajornartumik politikkikkut suliassat assigiinngitsut nammineq naammaginngisaminnut inaarsartarpaat, Martha Labansen oqarpoq.

Martha Labansen ilanngullugu isumaqarpoq Naalakkersuisuni ilaasortat ilaasa imminnut iluaqutaasussat ilaatigut kisiisa aalajangiiffigisaraat, tamannalu kikkunnut tamanut iluaqutaanngitsoq. Aalajangikkammi amerlanerussuteqartut soqutigisaannit aallaaveqartariaqartut Martha Labansen oqarpoq.

Siulittaasunngorusuttoq

Erik Jensen Inatsisartuni ilaasortaanermini ingerlaannassaaq - kisianni aamma Siumumi siulittaasunngorusuppoq.

- Siunniuteqqavara. Tassa taanna sulissutigissavara. Aamma angussaqqaarpara. Taanna upperaara, naalakkersuisuni maanna ilaasortaasimalersoq KNR-imut tallimanngornermi ualikkut taama oqarpoq.

Tamannalu Martha Labansenimut tusarluarnartuuvoq.

- Tassanilu isumaqarpunga massakkut soqutiginartuusoq Erik Jensen tunuarnermini erseqqissumik oqaatigimmagu; Nå, isumaqatigiinngisssutit piinnarnagit, taavalu aamma pissutsit allanngornissaannut kissaateqaannarnanga massakkut nammineerlunga saqqummerusuppunga. Taavalu imminut neqeroorutigaluni siulittaasussatut nutaatut.

AAMMA ATUARUK Kritiske lokalformænd: Kielsen har været for fraværende

Erik Jensenip siulittaasortik Kim Kielsen oqittorsiortittuaannarnikuunngilaa. Taanna kommunimi politikeriunermini Kim Kielsenimit 2017-imi naalakkersuisunngortinneqarpoq. Naalakkersuisut mittarfiliortiternissamut danskit aningaasalersueqataanissaannut isumaqatigiissutaat siorna tapersinngilaa.

Naalakkersuisuini ataatsimiinnerni sammineqartut avammut oqaatigeqqusaanngimmata qanoq oqartoqarnersoq oqaatigisinnaanagu kingusinnerusukkut oqaatigaa, avissaartuuttoqannginnerarluguli.

Siumumiilli Inatsisartunut ilaasortat amerlanerussuteqartut Kim Kielsenip siulittaasutut tunuarnissaanik aasaq piumasaqarmata, avissaartuunneq erseqqarippoq. Siumumeersut arfineq-marluk taamani tunuaqqusipput, taakkunani Naalakkersuisunut ilaasortaq ataaseq ilaavoq, tassalu Erik Jensen.

Erik Jensen ukiuni marlunni naalakkersuisuunermini aatsitassanut, suliffeqarnermut, aalisarnermut, piniarnermut, nunalerinermut, kommuninut, nunaqarfinnut, isorliunerusunut, attaveqaatigiinnermut ineqarnermullu akisussaasuuvoq.

Tamatuma saniatigut peqqinnissamut, isumaginninnermut inatsisinillu atuutsitsinermut naalakkersuisuugallareerpoq.

KNR-imit Kim Kielsen oqaloqatigineqarpoq, pisorli pillugu taanna oqaaseqarusunngilaq.