Løkkep Savalimmiunut qineqqusaariartornera isornartorsiorneqartoq
Ministeriunerup Lars Løkke Rasmussenip (V) qineqqusaartoqaleruttornerani tallimanngorpat Savalimmiunukartussanngornera Savalimmiormiut ilaannit ilassilluarneqanngilaq.
Venstrep Savalimmiuni partiitut suleqataa - Sambandspartiet - Folketingimut ataatsimik qinigaatitaqarnissaa qinersisartunik isumasiuinerit takutippaat.
Savalimmiunilu partiit allat Løkke Savalimmiuni politikkikkut akuliunnerarpaat - taamatuttaarlu Savalimmiuni qineqqusaarnermut.
Avissaarniaqatigiit partiiannit Tjóðveldimeersoq Magni Arge taama oqarpoq.
- Danskit ministeriannik qineqqusaarnerup nalaani Savalimmiunut tikeraartoqartussanngornera kingullermi Stauningip nalaani pivoq.
- Løkkellu talerperlernit qingaasoqarnissaanik qulakkeerinninniarneratut isigaara, Arge oqarpoq.
Taanna qinigaaffimmi qaangiuttumi Folketingimut ilaasortaavoq.
- Aamma Savalimmiut Danmarkimit avissaariartorpallaarnissaa ernumassutigivaa, ministeriunertullu ingerlaqqinnermigut taama pisoqarnissaa pinngitsoortinniarsariniarpaa, Arge oqarpoq.
Dronning Margrethep 2015-imi qineqqusaartoqarnera pissutigalugu Savalimmiunut tikeraarnissaminik kinguartitsinera aamma tikkuarneqarpoq. Qineqqusaarneq sunniuteqarfigiumanagu taamani taamaaliorpoq.
Løkkep Atlantikup avannaamiuni talerperlernit tapersersorneqarnissaminik kissaateqarluni oqarnera ajoriffissaqartinnagu Venstrep partiitut suleqatigisaata siulittaasuata Bardur à Steig Nielsenip oqaatigaa.
- Ilaasortat Atlantikup avannaaneersut sisamat qinigaaffimmi qaangiuttumi talerperlernik tapersersuisuupput. Aamma ministeriunerup qineqqusaarnermi ulappuseruttorfimmini naalagaaffeqatigiit samminissaannut piffissaqarnera pitsaasutut isigivara, Bárður à Steig Nielsen taama oqarpoq.
Folketingimit ilaasortanit 179-iusunit sisamat Atlantikup avannaaneersuupput. Løkkelu Savalimmiunukartussaasoq, nunatsinnukarnissanili juunip tallimaani qinersinissaq sioqqullugu angumerisinnaanngikkaa, Venstrep tusagassiisarfiata paasissutissiissutigaa.
Danmarkimit nunatsinnut aqqutissat ajornakusoornerunerannik, Løkkellu qinersinissap tungaanut pilersaarutaani inissaqannginneranik pissuteqartoq Venstre tusagassiisarfianit oqaatigineqarpoq.
Løkke tallimanngorpat ullup qeqqata missaani Savalimmiunut tikissaaq. Unnukkullu angerlamut aallassaaq. Thorshavnimi oqallitsitsineq peqataaffigissavaa kapisilinnillu tukertitsiviit pillugit paasisassarsiorluni angalaqataassalluni.
Gallupip Savalimmiuni qinersisartunik isumasiuinera kingulleq, maajip 23-ani saqqummiunneqartoq, naapertorlugu Sambandspartiet aamma Socialdemokratiet Savalimmiunit Folketingimut qinigaatitaqassapput. Partiit taakku naalagaaffeqatigiinnermik tapersersuisuupput.
/ritzau/
