Kuupik: Sarap tunuarnera arnat sulinermi atugaasa pitsaannginnerannik takutitsivoq
Angutit inuusukkunnaarnikut nunatsinni naalakkersuinikkut pissaaneqartuupput arnallu sulerujussuaqqaarlutik ilungersorujussuaqqaarlutillu taamatut angusaqartarlutik. Tamannalu naalakkersuinermi sulialinni eqqarsaatigeqqinneqassasoq, Kuupik V. Kleist neriuppoq.
- Neriuppunga ilaatigut Sarap tunuarneratigut tamakkua eqqumaffigineqarnerulissasut. Aamma nunatsinni pisariaqartittorujussuuarput, arnanik amerlanerusunik naalakkersuinikkut peqataasoqarnissaa oqartussaasoqarnissaalu. Inuiaqatigiinni pissutsit eqqarsaatigalugit oqimaaqatigiinnerusumik ingerlatsisoqarnissaa saneqqunneqarsinnaanngitsoq isumaqarpunga, Kuupik V. Kleist oqarpoq.
AAMMA ATUARUK Sara Olsvig Inuit Ataqatigiit siulittaasuattut tunuartoq
Sara Olsvig Inatsisartunit tunuarmat, Inuit Ataqatigiit sinniisussaat siulleq Aqqa Samuelsen Inatsisartunut ilaasortanngussaaq. Taamaalilluni arnat nunamut tamarmut politikerini ikinnerulissapput. Inatsisartunimi ilaasortat 19-it angutaapput aqqaneq-marlullu arnaallutik.
Arnat nuna tamakkerlugu naalakkersuinermi suliaqartut ikiliartortut, Kuupik V. Kleist naliliivoq, tamannalu naalakkersuinermik suliaqarnermi atukkat pitsaannginnerannik takussutissaanerarpaa.
AAMMA ATUARUK Peqqissaarpallaannginneq - pissaaneqarniuppallaarneq
Taamaanneralu illuanut saatinniaraanni inuit imminnut naligisariittut isigisariaqartut, taavalu arnat angutillu naligiinnerullutik imminnut isigisariaqartut, naalakkersuinermik misilittagalik oqarpoq.
Kuupik V. Kleistip Naalakkersuisunut siulittaasunngornermini Ane Hansen aalisarnermut piniarnermut nunalerinermullu naalakkersuisutut toqqaramiuk qanoq pisoqarnersoq eqqaamavaa.
Tamannalu arnat angutillu naalakkersuinermik suliaqarnermi naligiinnginnerannut takussutissaanerarpaa.
- Ane Hansen ikkukkatsigu angutit akornanni pingaartumillu soorunami aalisartut akornanni qanoq annertutigisumik naammagittaalliortoqartigisoq, arnaq aalisarnermut piniarnermullu naalakkersuisuusinnaasutut isigineqarani. Kisianni tassa takutipparput, suliani amerlasoorpassuarni angutaaneq arnaanerluunniit apeqqutaanerpaajunani kisianni naalakkersuinikkut isummersinnaaneq suleqatiginnissinnaanerlu apeqqutaasoq, Kuupik V. Kleist oqarpoq.
Ane Hansen aalisarnermut piniarnermut nunalerinermullu naalakkersuisuusartuni suli arnartatuaavoq.
