Sara Olsvig Inuit Ataqatigiit siulittaasuattut tunuartoq
Sara Olsvig Inuit Ataqatigiinni ukiuni sisamani siulittaasooreerluni tunuarpoq. Nunatsinni partiit anginerit aappaanni politikerip nuimasup siulittaasutut ullumikkut ataasinngornermi nalunaaqutaq 13.00 tusagassiortunik katersortitsinermi tunuarluni nalunaarutigaa.
- Inuit Ataqatigiinnit ullumikkumit atuutilersumik siulittaasutut tunuarpunga, Sara Olsvig tusagassiortunik katersortitsinermi oqarpoq.
Sara Olsvigip Sermitsiaq.AG-mut oqaatigaa partiit akornanni politikkikkut pissutsit pissutigalugit tunuarluni.
Politikkimillu suliaqarnini taamaatillugu Sara Olsvigip aamma oqaatigaa.
Allaaserisaq videop kingorna nangissaaq.
- Inatsisartunit novembarip tallimaanit atuutilersumik tunuarniuteqarlunga siulittaasoqarfimmut nalunaarutigissavara.
Sara Olsvig partiimi ilaasortaaginnassaaq.
Sara Olsvig kimit taarserneqassanersoq suli nalunarallarpoq. Inatsisartulli ukiaanerani ataatsimiinnerisa kinguninngua partiimi ataatsimeersuartoqarnissaa Sara Olsvigip kaammattuutigaa.
Inuit Ataqatigiinni politikkikkut siulittaasup tullia Aqqaluaq B. Egede, aaqqissuussaanikkullu siulittaasup tullia Múte Bourup Egede, partiimi siuttuugallassapput, Sara Olsvigilu immikkut ittumik ataatsimeersuarnissamut piareersaaqataassaaq.
