Kunngip tikeraarnerani pilersaarutinik taamatitsiinnarnerup kingorna nutaanik marlunnik pulaagassaqalertoq
Kunngi Frederiup Kalaallit Nunaannut sapaatip-akunnerani uani tikeraarnerani pilersaarutai, sila peqqutaalluni arlaleriarlutik allanngorput.
Pilersaarutilli aaqqissuussaaqqissaaraluartut pulaarfissaanik pingasunngornermi marlunnik ilaneqartut, pilersaarutip kunngikkormiut nittartagaanni allaqqavoq.
Sumiiffimmi nalunaaqutaq malillugu Kunngip Inatsisartut siulittaasuat Kim Kielsen pingasunngornermi ullorornerani nereqatigissagaa, tassani allaqqavoq.
Kunngip pilersaarutaani pingasunngornermi ullaap tungaani Kalaallit Nunaanni universitetip pulaarnissaa kisiartaavoq.
Kunngip Inatsisartut siulittaasuat nereqatigereeruniuk Imarsiornermik ilinniarfik pulaartussaavaa, tassani pisortap Bent Olesenip ilinniarfiup ilinniarnermik imarsiornermillu Kalaallit Nunaanni ineriartortinneqarnera pillugu ilisarititsissaaq.
Qimussertoqassanngitsoq
Kunngi Frederik Illersornissamullu ministeri Troels Lund Poulsen (V), Station Nordimut Sirius-patruljeqariusumut pingasunngornermi tikeraartussaagaluarput. Silalli ajornera pissutigalugu taanna aamma taamaatiinnarneqarpoq.
Kunngi Sirius-patruljen peqatigalugit pingasunngornermi sisamanngornermilu qimusseqatigisussaagaluarpai, tassa Kunngip 2000-imi Sirius patrulje-mut angalaqataanermigut immikkut atassuteqarfigisaanut, silarlunnerata aamma pisinnaajunnaarsippai.
Kunngi Frederiup Kalaallit Nunaannut sapaatip-akunnera una tikeraarnera, USA-mut minnerunngitsumillu Donald Trumpimut, qallunaat- kalaallillu ataqatigiinnerinut ersersitsinerujussuarnertut naliliisartunit taaneqarpoq.
Kunngili “suliaqariartorluni” tikeraarnani oqarpoq. Kalaallit Nunaannut tikeraarnera, soorlu aamma aasaq tikeraarnerminut sumik suliaqariartornera pillugu, marlunngormat aperineqarami taamak oqarpoq.
