Kulusummi meeqqat juullimut poortugannatsinneqartartut
Islandermiut skakklubbiata ukiuni 15-ini Kulusuk nunatut ikinngutigaa. Ilaatigut nipilersornermi skakkernermilu Kulusummiuaqqanik, nunattali sunnerani ilinniartitsisarpoq.
Ukiunili tallimani arfinilinni kingullerni Kulusummut ileqqut allanik ilaneqarput. Klubbimiimmi meeqqanut juullimut poortugarsiassanik pajunneq ukiut tamaasa juullip qaammataa nalliukkaangat ileqquulerpoq.
Kulusumi Alivarpimmi pisortaq Justine Boassen suleqatigineratigut meeqqanut juullimi poortugarsiassat isumagineqartarput. Taassummami atuartut juullimut kissaataat allattorteriarlugit Islandimi juulimaamut nassiuttarpai.
Juullillu qaammataat nalliukkaanga juulimaaq meqqat juullimi kissaataat pajugutigisarpai.
- Islandimiit juulimaaq tikileraanga Kulusumi Alivarpimmi atuartut atuarfimmiit pisoqatigiillutik mittarfiliakaasarput. Poortugarsiassanik, mamakujuttunillu pinnattarput. Meeqqallu juullimut pinnersaasiaminnik juulimaamut tunissuteqartarput. Taamaalioreernermi juulimaaq Islandimut aallaqqittarpoq.
Margret Jonasdottir oqaluttuarpoq.
Juullimi meeqanut poortugaqassaaq
Taanna Kulusummi meeqqat tamakkerlutik poortugannannissaat naleqquttoq taanna isumaqarpoq. Akissaqassuseq piitsuussuserlunniit apeqqutaatinnagu meeqqat poortugannannissaat taassuma pingaartippaa:
- Aap, meeqqat nuannaartinnissaat, skakklubbimiit anguniagaraarput. Islandimiit nuannaarnermik Kalaallit Nunaannut tuniserusuppugut. Skakkimi ilinniartitsinikkut, juulimaaqartitsinikkut cirkusimilu isiginnaartitsinikkut taamaaliorsinnaalluta isumaqarpunga.
Islandimi suliffeqarfiit assigiinngitsut suleqatigiinnermikkut meeqqanut poortugarsiassanut aningaasaliisarput.
Kulusumi Alivarpimmi atuartut angajulliit juullimi poortugarsiassat saniatigut juulimaamiit ipadinik tunisittarput. Juulimaamik poortukkanillu angallassineq Islandimi timmisartuutileqatigiiffimmit Air Iceland Connectimit aningaasalersorneqartarpoq.
