Kujataani ukiuunerani qulimigooqartitsinissaq pillugu isumaqatigiissusiortoqartoq
Kujataani sillimmatitut 2023/2024-p ukiuunerani decembarip aallaqqaataanit februaarip 29-ata tungaanut qulimigooqartitsinissaq pillugu Ineqarnermut Attaveqaasersuutinullu Naalakkersuisoqarfik Air Greenlandimik isumaqatigiissusiornissaa Naalakkersuisut akuersissutigaat.
Naalakkersuisut tusagassiorfinnut nalunaarummi taama allapput.
2022/2023-p ukiuunerani sikuunera patsisaalluni, kiffartuussinissamik isumaqatigiissut malillugu imaatigut angallassinissaq qaammatini pingasuni unitsikkallarneqarpoq. Taamaalilluni Air Greenlandip qulimiguua ataasiinnaq nunap immikkoortortaani angallassisussanngormat, angallasseriaaseq unammillernartumik inissisimanikuulluni.
Ineqarnermut Attaveqaasersuutinullu Naalakkersuisoq, Hans Peter Poulsen, Siumumeersoq, taama oqarpoq:
- Ukioq kingulleq ukiuunerani umiatsiamik qulimiguulimmillu angalaniartut taamaatitsinernik, kinguaattoornernik, angalanissaasalu allanngortinneqarnerinik naleqqutinngitsumik nalaassipput. Taassumap saniatigut allakkat, poortukkallu nassiussat kinguaattoorput, Hans Peter Poulsen oqarpoq.
Taama pisoqaqqinnginnissaa siunertaralugu qulimiguullit AS-350-it marluk Narsarsuarmi aallaaveqartut, pisariaqalissappat 2023-mi decembarip aallaqqaataata, 2024-milu februaarip 29-ata akornanni angallassissutigineqalissapput.
Tamannalu angallassinermut qulakkeerutaasoq, Air Greenlandip pisortaata Jacob Nitter Sørensenip oqaatigaa:
- Isumaqatigiissut taanna pitsaasuullunilu pingaaruteqarpoq, ukiuni kingullerni sikuusarnera eqqarsaatigalugu Kujallermi angallassinermut qulakkeerutaammat. Angallatit atorsinnaannginnerini angallassinissamut timmisartoq ataaseq naammanngilaq taamaattumillu nuannaarutigaarput timmisartut pisariaqartitat qulakkeerneqarmata, Air Greenlandip pisortaanera Jacob Nitter Sørensen oqarpoq.
