Kujallermi borgmesteri neriuuteqalersitsiniartoq

Malene Vahl Rasmussen (D) Kommune Kujallermi ukioq ataaseq maanna borgmesteriuvoq.

Namminersorlutik Oqartussat isumaginninnermik suliassaqarfik qinigaaffimmi kingullermi akisussaaffigilerpaat, kommunilu aningaasaqarnikkut ajornartorsiuteqangaatsiarluni.

Tamanna kommunip akileraarutinut A-nut akiligassanik akiliisimannginnini pillugu eqqartuussivimmi suliami ajorsarneratigut ilaatigut ersersinneqaqqippoq. Eqqartuussivimmi suliaq Kommune Kujallermit suliareqqitassanngortinneqarpoq, tamannalu Nunatta Eqqartuussisuuneqarfiani suliarineqarnissaa naatsorsuutigineqarluni.

Borgmesterilli ukiup ataatsip ingerlanerani suliaqarnermi tusagassiuutitigut saqqummiunneqanngitsunik ajunngitsorpassuaqarnerarpaa.

Malene Vahl Rasmussenip oqarnera naapertorlugu kommunalbestyrelsip aningaasaqarnermut isumaginninnermullu tunngasunik aaqqiissuteqarnissaq ataatsimoorfigaat. KNR-ip Anders Olsen (S) aamma Stine Egede (IA) aamma oqaloqatigai, taakku suleqatigiilluartoqarnera aamma oqaatigaat.

Eqimattat nutaat

KNR-ip nunatta kujataani borgmesteri Demokraatit Nuummi allaffianni naapippaa.

Taanna illoqarfiit pingaarnersaannut sapaatip akunnerani tikeraarpoq. Sapaatip akunnera USA-mit tikeraartoqarneranik, borgmesterit nunaqarfinni atugassarititaasut pillugit inuussutissarsiorneq pillugu Future Greenlandimi ataatsimeersuarnermi oqaloqatigiinnerannik kiisalu Amerikamiut sinniisoqarfittaavata ammarneqarneranik akerliussutsimillu takutitsisoqarneranik ilaqarpoq.

Tamatuma saniatigut Stine Egede peqatigalugu naalakkersuisut tamaasa ataatsimeeqatigai.

- Aatsaat ippassaq siullermeerlunga freerpunga. Pilersaaruteqaannaavikkama, Malene Vahl Rasmussen oqarpoq.

Naak Kommune Kujalleq aningaasaqarnikkut ajornartorsiuterpassuaqaraluartoq kommunimi ilorraap tungaanut mumikkiartulersoq, Malene Vahl Rasmussenip (D) takusinnaavaa: - Mumittoqariartulersoq malugisinnaavara, borgmesteri oqarpoq. Assi © : Markus Valentin / KNR

Taassuma borgmesteritut atuunnermini ukioq siulleq ilungersunarsimasoq isertuutinngilaa.

- Kisianni aamma pissannganarnikooqaaq. Aqutsisoqanngitsoq kommunimilu pisortaaneq soraangajalersoq aamma atuutilerpunga. Taamaammat ukioq siulleq aqutsisussanik atorfinitsitseqqaarpoq.

Borgmesterip atorfinnut naak qinnuteqartorpassuugaluartut atorfiit inuttaqanngitsut inuttalipallanneqarnissaat tuaviuussimannginnerarpaa. Qinnuteqartut eqqortumik misilittagaqaannartuunatik; atorfimmut aamma eqqortuusussaapput.

- Ajornartorsiuteqareerluta kukkoqqissinnaanngilagut. Taamaammat kukkusumik toqqaaneq ukiunut tulliuttunut sisamanut aamma kingunerluuteqarsinnaavoq.

Kujataanut angerlartoq

Malene Vahl Rasmussen Facebookimi allaaserisamik takusaqareernermi kingorna illoqarfimmut peroriartorfimminut angerlarnissani aalajangersimanerarpaa.

Nammineerluni iliuuseqanngikkaanni allanngortoqarnavianngitsoq, ikinngutitoqaa allappoq. 

Kommune Kujallermut tunngatillugu ajortumik saqqummiussisarnerpassuit innuttaasunit pitsaanngitsumik isiginnilersitseqataasut borgmesteri aamma oqarpoq.

Taamaammat taassuma kommunalbestyrelse peqatigalugu oqaluttuamik mumisitsisinnaassallutik neriuutigaa.

- Neriuut tuniluuttarpoq. Pitsaasumik iliuuseqartoqartoq tusaraanni tamanna allanngueqataarusulersitsisarpoq.

Malene Vahl Rasmussenip (D) ukioq siulleq borgmesteriunini kommunalbestyrelsip suleqatigiinnissamut isumaqatigiissutip sinneranik suliaqarnissaanut piareersaanissamut atorsimasoraa: - Quppernermi tullia, pingajua sisamaalu angusinnaagivut maanna qularutiginngilara. Eqimattanik eqqortunik atuutsitsilersimanngikkaluaruma taama iliorsinnaanavianngikkaluarpunga, borgmesteri oqarpoq. Assi © : Markus Valentin / KNR

Pissutsillu allanngoriartulereernerat takusinnaanerarpaa inuillu illoqarfimmut utertut amerliartorput.

Qinerseqqittoqalerpallu tamatuma kisitsisitigut takuneqarsinnaanissaa qinigaaffimmi matumani anguniagaraa.

- Inuit nuussortarnerat qinigaaffima naajartornerani mumisikkiga takussavarsi.

Naak kisitsisitigut aalajangersimasumik anguniagaqarnissamut kajumissaarneqaraluarluni Malene Vahl Rasmussen tunuarsimaalaarpoq.

- Inuit takorluuillaqqinnerput nuannarilluinnarpaat. Siunissaq ungasinnerusoq eqqarsaatigisarparput. Politikkikkullu nukissaqarnerput, aqutsisutta tungaanniit aamma, maannakkorpiaq sunniuteqarluaqaaq.

Pilersitseqqinneq aserorterinerluunniit

Namminersorlutik Oqartussat Kommune Kujallermi aningaasaqarnikkut pissutsit saqqummiunneqarmatali, pilersitseqqinnissamut pilersaarusiaq isumaqatigiissutigineqarpoq. 

Isumaqatigiissummi piumasaqaatit arlaliupput, assersuutigalugu pisortat missingersuutaanni sipaaqqusisoqarpoq.

Malene Vahl Rasmussenilli kommunip aningaasaqarniarnera inuit nammineq aningaasaqarneratulli innginnera erseqqissaatigaa.

Borgmesterip soraarsitsiortornerit sipaarniarnerillu atorunnaarsitsinissaat, tamatumalu inuit nuukkusulernissaannik kinguneqarsinnaanera ernummatigaa.

Kommunalbestyrelsip aningaasaqarnikkut pissutsit pissutigalugit akileraarutit kommunillu inissiaataanik attartorneq akisunerulerpoq. Assi © : Markus Valentin / KNR

Illit borgmesteritut isumaqatigiissut qanoq allanngortikkusuppiuk? 

- Isumaqatigiissut maanna atuuttoq, oqartarnittut aserorterinissamut pilersaarutaavoq. Kommunimut iluaqutaanani aserorsaataaneruinnarpoq.

- Ajunngitsumik siunertaqarluni atuutsinneqalernera nalunngilara, aningaasanillu taama amerlatigisunik atorniarnissamut piumasaqaateqartoqartariaqartoq, eqqarsaatigilluagaanngilarli. Piviusorsiorpalaanngitsumik suliaavoq.

Taamaattumik borgmesterip naalakkersuisut Kommune Kujallerlu nutaamik isumaqatigiissusiornissaat piffissami tulliuttumi sulissutiginiarpaa.

- Kommunimi pissutsit piviusut, pilersaarummut nutaamut tunngaviliisussat, takutinnissaat akisussaaffigaarput.

- Suut piviusorsiorpalaarnersut suullu piviusorsiorpalaannginnersut maanna ilisimavarput.