Kujallermi aalatitsinerulissasut: Timersuleraangatta eqqarsartarpugut kiisami atuakkerinata
Timersoqatigiit Kattuffiata (GIF-ip) siulittaasua Kommune Kujallermilu borgmesteri, Stine Egede kommunip suliffeqarfiani sulisut aalanerulernissaanut isumaqatigiissuteqarput.
Taamaammat KNR-ip Qaqortumi inuit aalanerulernissaminnut piareersimanersut paasiniarlugit aqqusinermi naapippai.
Arne Louie Møller Qaqortumi Niuernermik Ilinniarfimmi ilinniartitsisuuvoq. Taamaammat taanna ullup ilarujussua issiasinnaasarpoq.
- Ulloq naallugu issiasarpunga uanga, aalanerpaasarput immaqa assakka niaqoralu, taanna oqarpoq.
Ilinniartitarisartagaasalu ilaat inimi atuartitsiviusumi timiminnik aalatitsisarput – taamaammat atuartitsinermi aalanerulersinneqarnissaminnut ersinngillat.
- Maani atuarfimmi timerput aalatittarparput, fagi aalajangersimasoq atuaqatigiiulluta sammisarparput, Dina Qaavigaq oqarpoq, nangillunilu:
- Internetsikkut malitaqartarpugut, kissasseriarluta naggataannik træneriarluta tasittaarlutalu.
Dina Qaavigallu aalanerunissap pitsaaqutaa takusinnaavaa.
- Timersuleraangatta imaanartarluni kiisami atuakkerinata. Piumassuseqarneq takkuttarpoq timersorsimatilluta, aalasimagaangatta atuakkanik sammisaqarnissatsinnut nukissaqarnerulluta.
Innuttaasut nunarsuarmi aalanerpaat
Nunatsinni Timersoqatigiit Kattuffiata nunatsinni innuttaasut nunarsuarmi aalanerpaanngortinnissaat anguniagaraa. Suliniut taanna Aalasa-mik taaguuteqarpoq.
Borgmesterip Stine Egedep isumaqatigiissuteqarnerata saniatigut Kommuneqarfik Sermersuumi borgmesteri, Avaaraq Olsen aamma borgmesteri Malik Berthelsen isumaqatigiissuteqarput.
GIF-ip siulittaasuata, Claus Nielsenip Avannaata Kommunia aamma Kommune Qeqertalik tullinnguuttut oqaatigaa.
Suliffeqarfinni allaffissorfiusuniunerusoq sulisut ullormut timiminnik aalatitsinerunissaat, imaluunnit suleqatigiit pisuttuaqatigiittarnissaat Timersoqatigiit Kattuffianiit kaammattuutigineqartut ilagaat.
- Nuannaarutigaara Timersoqatigiit Kattuffiata siunissami Nunarsuarmi aalanerpaanngornissamut suliniutaanut atatillugu akornatsinni qaninnerusumik sinaakkusikkanillu anguniagaqaqatigiinnissatsinnut aallarniutaasumik suleqatigiinnissamik isumaqatigiissuteqarnerput. Tamannami kommunitsinni inuttaasut peqqinnartumik inuuneqartut amerlisaqqinnissaannut aqqutissiuusseqataassaaq, borgmester Stine Egede oqarpoq.
GIF kommunilu piffissami aggersumi qaninnerusumik suleqatigiissapput, ataatsimullu anguniakkanik aallartitsissallutik, taamaalilluni kinguaariit akornanni timersornikkut ataatsimoorfeqarnissaannik ilaatigut qulakkeerinninniartoqassaluni.
Aalaneruniarnissaq ajornakusoortoq
Aqqusinermut naapitatta ilaat, taxartartoq Christian Lynge Hard pissutissaqavilluni timiminik aalatitsivallaarneq ajornerarpoq.
- Uanga timersornissamut periarfissakka maannakkut killeqartorujussuupput, siffiarluttorujussuullungalu seeqqorluttorujussuugama.
Taxartartoq siornatigut isikkamik arsartaraluarami unittariaqalernermi kingorna issianerusalerami puallarsimanerarpoq.
- Ingammik arsarsinnaajunnaarluni aalasinnaaneq killeqalernikuunermik, taamaalilluni sanigorsarsinnaaneq killeqalerluni aamma, Christian Lynge Hard oqarpoq.
Taamaammat sunngiffimmini siornatigutulli timersornani angerlarsimaannartarnerarpoq.
- Nikippiarneq ajorpunga, freeraangama allatut ajornartumik kisiat tassa fjernsynernersuaq, internetsinngikkaanni.