Millionilikkaanik kræftimik eqqugaasunut illuliornissamut aningaasaleeqataasoqartoq
Aningaasaateqarfimmi A.P.Møller Fonden kræftimik eqqugaasunut illussamut 10 millionit koruuninik tunissuteqarpoq. Neriuffiit Kattuffiata illutaassaa Dronning Ingridip Napparsimmavissuata ungasinngisaani maanna sanaartorneqartussanngorpoq.
Knæk Cancer, Kalaallit Nunaanni nuna tamakkerlugu katersineq naalagaaffillu illutaassamut aamma aningaasaleeqataapput, illutaassarlu taanna aappaagu sanaartorneqalissalluni.
Kræftimik eqqugaasut taakkulu qanigisaat illumik katsorsaanerup nalaani ornittagaqarsinnaanngornissaat nuannaarutissaasoq, Neriuffiit Kattufffianni siulittaasoq Elisabeth Lynge Hansen oqarpoq.
AAMMA ATUARUK Neriuffik får sit eget hus i nærheden af Dronning Ingrids Hospital
- A.P.Møller Fondenip aningaasaliineratigut Kalaallit Nunaanni kræftimik eqqugaasut taakkulu qanigisaat ikiorneqarnerat pitsaanerungaatsialissaaq. Illussaq pisariaqartinneqarsimaqaaq, Kalaallit Nunaanni kræftimik eqqugaasut katsorsarneqarnerminnut atatillugu pisariaqartitaminnik siunnersorneqarsinnaalissapput, Elisabeth Lynge Hansen oqarpoq.
Nuummi ilinniartunut najugaqarfitoqaq ingutseriarlugu toqqavia Neriuffiit Kattuffiata illussaanik sanaartorfigineqartussanngortoq, aasaq allaatigaarput. Qaquguli sanaartorfigineqassanersoq taamanikkut ilisimaneqanngilaq.
Kræftimik eqqugaasimallutik ilisimatinneqariitsiarlutik tapersersorneqartartut amerliartuinnartut, Danmarkimi kræftimik eqqugaasunut illut ilaanni erserpoq.
Kræftimik eqqugaasut illussaat kræftimik pinngitsoortitsiniarnermut aamma atorneqassaaq, kræftimillu nappaatit assigiinngitsut pilertornerusumik paasineqarsinnaanissaat aamma neriuutaavoq katsorsaanerillu ataqatigiissaarluarneqarsinnaalissallutik.
AAMMA ATUARUK Neriuffiit Kattuffiat drømmer om et kræftcenter
Tamannalu pisariaqartinneqarsimaqaaq. Innuttaasummi nunatsinni kræfteqalersartut ajoraluartumik amerliartorput.
Danmarkimullu saniulliukkaanni nunatsinni kræftimik toqquteqartut marloriaataanik amerlanerupput. Amerlasuutigut kræftip siusissukkut paasineqarsimannginnera pissutaasarpoq.
Nunaqarfimmeersut avinngarusimanerusuneersullu aamma immikkut ikiorneqarlutillu siunnersorneqarsinnaaqqullugit, attaveqaatit digitaliusutigut siunnersuineq kræftimik eqqugaasut illussaanni aamma neqeroorutaasassaaq.