Neriuffiit Kattuffiat Dronning Ingridip napparsimmavissuata ungasinngisaani illutaalersoq
![](/sites/default/files/styles/image_934x467/public/article_images/neriuffiup_kattuffissaat.jpeg?itok=qyHB8nXN)
Neriuffiit Kattuaffiat Nuummi napparsimmaviup ungasinngisaani illutaassaaq. Tamanna Neriuffiit Kattuffiani ulluinnarni allaffissornermut ingerlatsisup nuannaarutigigaa.
- Kiisami illu kissaatigisarput piviusunngulerpoq. Suliarinnittussat inissikkunik atsiugassallu atsiortiterunik sanaartorneqalissaaq, qilanaareqaara.
- Atorfissaqartipparput amigaatigivarput, Neriuffiit Kattuaffiani allaffissornermi aqutsisoq, Aviâja Lynge oqarpoq.
Nuummi ilinniartut najugaqarfiat atorunnaartoq Rotary kolligiamik taaguutilik ingutserlugu Neriuffiup kattuffiata qitiusumik allaffimmik sanaartorfigissavaa.
Taassumalu ingutsernissaanut Naalakkersuisut 1,5 millionit koruuninik tapiissuteqarput.
Illussanik titartaasartut Neriuffiup qitiusumik allaffeqarfissaatut siorna titartagaat isumassarsiorfigneqarpoq, taannalu 11-13 millionit koruuninik naleqassangatinneqarpoq.
Aningaasartuuterpassuit iluaqutinngortussat
- Ukiut tamaasa pikkorissartitsinerni akunnittarfinnut aningaasarpassuit atortarpagut, taavalu ataatsimeersuarneq 300.000 koruunit missaanik akeqartarpoq. Aningaasarpassuit aningaasartuutigisartakkagut nammineq illutaarutta allanut atorsinnaalernissaat anguniarlugu illumik kissaateqarnikuuvugut, Aviâja Lynge oqarpoq
Kattuffiup ingerlatsisuata oqarnera naarpertorlugu, nunatsinni innuttaasut ukiumut ikinnerpaamik 200-t kræftimik eqqugaasarput.
AAMMA ATUARUK Neriuffiit Kattuffiata namminerisaminik illuutissaminut katersat ilai atussagai
Qitiusumik allaffik Dronning Ingridip napparsimmavissuanut, allakkerivimmullu ungasissumiinnginnissaa Neriuffiup kissaatigaa.
- Napparsimmavimmut qaninnissatsinnut piumasaqarnerput peqquteqarpoq, tassami kræftilersimasoq pilatseeqammisimappat immaqaluunniit pitsorluppat, napparsimavissunninngitsumut iseriaannaanissaa kissaatiginikuuarput.
Isumaginninnermut siunnersortinik atorfinititsiniartut
Qitiusumik allaffeqarfissaq kræftimik eqqugaasunit ilaqutaasunillu atorneqartassaaq. Illillu piviusunngoraluttuarnera aamma ilutigalugu pilersaarutit ineriartortinneqarput.
- Neriuffiup kattuffiani ilaasortarpassuit sinerissami illoqarfinni 14-ineersut tikerartarput ataatsimeersuariarlutik. Aamma taakku isumassarsiaasa ilagaat isumaginninnermut siunnersortimik atorfinititsisoqarnissaa. Tamannalu tamatta isumassarsiatsialaasoraarput, Neriuffiit Kattuaffiani allaffissornermi aqutsisoq, Aviâja Lynge oqarpoq.
AAMMA ATUARUK Nappaassuarmut akiuiniarnermut katersat 4 millioningajaapput
Neriuffiit Kattuffiat illutaarnissaminnut aningaasaliissussarsiornerminni ilaatigut Kræftens Bekæmpelsemit 6 millionit koruuninik tapiiffigineqarpoq, saniatigullu suliniutissanut aningaasanik 4 millionit koruuninik aningaasaliiffigineqarluni.