Neriuffiit Kattuffiata namminerisaminik illuutissaminut katersat ilai atussagai
Neriuffiit Kattuffiat namminerisaminik Nuummi illuutitaarusuppoq. Kattuffiup allaffeqarfiani ingerlatsisoq, Aviâja Lynge, naapertorlugu kræftertut amerlanerpaartaasa napparsimallutik Nuummi paasisarpaat. Taamaattumik taakkua neqerooruteqarfigerusullutigit iseruminartumik allaffeqarfiutigisumik illuutitaarusupput.
- Taassumalu saniatigut aamma oqaloqatiginnittarfiusinnaasumik toqqissisimanartumik ilisimasalinnik aamma oqaloqatiginniffiusinnaasumik saniatigullu aamma assersuutigiinnarlugu ataatsimeersuarfigineqarsinnaasumik pikkorissarfigineqarsinnaasumillu atorneqarnissaa takorloorparput, Aviâja Lynge KNR-mut oqarpoq.
Illumi pikkorissaasalerusuttut
Neriuffiit Kattuffiat sinerissami illoqarfinni arlalinni immikkoortortaqarfeqarpoq. Kattuffillu illuutitaarsinnaassappat kræftimik napparsimalertunut qanigisaannullu oqaloqatiginnittartut, illoqarfinnit tamalaaneersut, pikkorissarneqartarnerat ajornannginnerulissagatinneqarpoq.
AAMMA ATUARUK 500-t kræftimut misissortinnissamut utaqqisut - Neriuuffiit Kattuaffiata tamanna tupaallaatigigaa
- Pisariaqartinneqartorujussuugamik taakkua oqaloqatiginnittartut. Taakkua pikkorissarneqartarsinnaapput tassani illumi, akunnittarfinnut ataatsimeersuartarfilinnut akisoorujussuusartunut tamakkua aningaasartuutit atortanngikkaluarlugit. Neriuffik nammineerluni allatulli kattuffittulli, Atorfillit Kattuffiattulli SIK-tulli illuuteqartuuguni qanorli pitsaatigissagaluarpa, Aviâja Lynge oqarpoq.
Neriuffiit nuna tamakkerlugu siorna katersuiniaramik, katersuiniartalernerminniit aatsaat taamak amerlatigisut katersorlugit aningaasat 3,9 millionit koruunit katersorpaat.
AAMMA ATUARUK Siulittaasoq katersuiniarneq pillugu: Tupannermik uippallingajappunga
Katersuiniarneq KNR TV-kkut Katuamit toqqaannartumik unnugu nalunaaqutaq arfineq pingasunit aallakaatinneqassaaq.
KNR.gl-imi isummersorfik teknikkikkut ajutooqqavoq. Ajoqutaa misissorparput.