500-t kræftimut misissortinnissamut utaqqisut - Neriuuffiit Kattuaffiata tamanna tupaallaatigigaa
Misissortinnissamut utaqqisarnerup nappaatillu suussusersiaarneqarnerusalernissaannut, Naalakkersuisut 8,2 millionit koruuninik immikkoortitsipput.
Erlukkut inaluarsuakkulluunniit kræftimut misissortinnissamut utaqqisut maanna 500-uupput. Neriuffiit Kattuaffiatalu taama amerlatiginerat tupaallaatigaa.
-Kisitsisit taakkua piginngilagut, kisianni tupaallannarlunilu suliniartuulluni aqajannguummernartorujussuuvoq. Aliatsannaqaaq, Neriuffiit Kattuffiata siulittaasua Mette-Sofie Jørgensen oqarpoq.
Naalakkersuisut kræftimut pilersaarut 2013-meersoq sapaatit akunnerata siuliani nalilerpaat.
Nunatsinni utaqqinerit sivisussusaat assigiinngeqeqisut
Angutit arnallu quliugaangata ataaseq nappaatimik suussusersinissaanut ukioq ataaseq sinnerlugu utaqqisartoq, kræfteqartut 158-it katsorsarneqarnerat naliliiffgineranni erserpoq.
- Sunaaffa taama amerlatigisunik utaqqisoqarpoq. Tamanna utaqqisut eqqarsaatigalugit ilunngunarpoq, paasisaqarnissamummi utaqqineq qanoq nuanniitsigisinnaasoq nalunnginnatsigu, Mette Sofie Jørgensen oqarpoq.
AAMMA ATUARUK Aningaasanut inatsimmi: Kræftip suussusersinissaanut utaqqisarneq sivisuallaarpoq
Nunarpulli tamakkerlugu isigissagaanni, Nuummi nakorsiaraanni siusinaartumik paasineqarsinnaasarpoq, agguaqatigiisillugumi ullut 46-t ingerlaneranni paasineqarsinnaasarmat, sinerissallu sinnerani ukioq ataaseq sinnerneqarsinnaasarluni.
Tamannalu allanngortinniarlugu inaluarsuakkut qinnguartaammik misissuillutik angalasartoqatigiit, peqqissaasut pingasut nakorsarlu immikkut ilisimasalik, nunap immikkoortuini tassalu Ilulissani Qaqortumilu misissuisartussatut ukiumit nutaamiit sulilernissaannut aningaasanik millionilikkanik illikartitsisoqarpoq.
Pitsaanerusumik ikiorneqartalernissaat neriuutigigaa
Tamatuma saniatigut atortunik nutaanik Qaqortumut, Tasiilamut Sisimiunullu nassiussisoqassaaq.
- Neriuppunga nappaataat sukkanerusumik suussusersineqartalerlutillu katsorsaanerit sukkanerusumik aallartinneqarsinnaallissasut. Neriullualersitsivoq. Neriuffiit Kattuffiata siulittaasua oqarpoq.
Kalaallit Nunaanni inuit ukiumut 200-it kræfteqartut paasineqartarput, taakkunanngalu 110-it missaat kræftimik toqquteqartarlutik.
Kræftimik nappaatillit pitsaanerusumik ikiorneqartalerumaartut, Neriuffiit Kattuffiata neriuutigaa.
- Akuersaarneqarsinnaanngilaq. Ajuusaarnarpoq taama sivisutigisumik utaqqisinneqartarmata. Taamaallutimmi immaqa kingusinaartumik paasineqartarlutik, Neriuffiit Kattuffianni siulittaasoq Mette Sofie Jørgensen oqarpoq.