Nappaassuarmut akiuiniarnermut katersat 4 millioningajaapput

Tallimanngormat nuna tamakkerlugu Neriuffiit Kattuffiata nappaassuarmut kræftimut akiuiniarnermut atugassanik katersuiniarnerani aningaasat 4 millioner koruuningajaat katersorpai.
- Angusaq tuppallernaqaaq, kattuffimmi siulittaasoq, Johanne Ezekiassen.  Assi © : Neriuffiit Kattuffiat
Allattoq Karline Platou, Anders Dall
oktobarip 03-at 2021 11:15

3.924.712 kroner.

Tallimanngormat nuna tamakkerlugu katersuiniartoqarnerani aningaasat angusat Neriuffiit kattuffiata nuannaarutigeqai.

Ippassaq tallimanngornermi nappaassuarmut kræftimut akiuiniarluni nuna tamakkerlugu katersuiniarnermi Neriuffiit Kattuffiat aningaasannangaatsiarpoq.

Aallakaatitsinermi ingerlatsisut ippassaq oqaatigaat katillugit aningaasat 3.924.712 koruunit katersorneqarsimasut. Taamaalillunilu siorna katersorneqartunut sanilliullugit 1000 koruunimik amerlanerulaalerput. Siornami 2020-mi katersorneqartut katillugit 3.923.213 koruuniupput.

- Soorunami unnuup ingerlanerani pissanganarsimavoq, aningaasat qanoq annertutigisut angujumaassanerigut. Inernerilu paasitinneqarmata assut tuppallernaqaaq angusarmi annertuvoq, aningaasarpassuimmi matumani pineqarput.

- Assullu qujamasunnarpoq soqutiginnillutik peqataasunut aaqqissuisunullu pikkorissunut, tamakku tamarmik kusanangaartumik tunniussaqarluarput, Johanne Ezekiassen Neriuffiit kattuffiani siulittaasoq oqarpoq.

AAMMA ATUARUK Neriuffiit Kattuffiata namminerisaminik illuutissaminut katersat ilai atussagai

 

Illutaarnissaq

Neriuffiit kattuffiata siusinnerusukkut aamma oqaatigaa aningaasat ilaat illutaarnissamut atorneqassasut:

-  Aningaasat soorunami katersuiniarnerup siunertaanut atorneqassapput, tassa nappaammut eqqugaasunut atorneqassapput aammalumi taakku siunissami salliutinneqartuartarumaarput. Tusagassiutinulli aamma saqqummiutereerparput aningaasanik ileqqaarininneq ingerlakkipput illutaanissarput anguniarlugu, taamaalilluni sullissineq eqaannerusoq sinerissamut tamarmut aallaaveqarmat ileqqaarnerput nangeqqissavarput, oqarpoq.

Siorna ukioq mannalu katersat nikingassutaat 1000 koruuneqqissaannguuvoq, inerneralu taamaammat aamma alutornarpoq.-

- Soorunami tulluuteqaagut siornarniit qaffasinnerulluni aamma tupaallassutigaarput taamatut siorna angusarisimasat qaangeqqikkatsigit, Johanne Ezekiassen tulluusimaarluni oqarpoq.

 

 

Aamma atuaruk