Koreameersut Qaanaami Siorapalummilu kivissat pillugit tv-kkut piviusulersaarusiorput
Sydkoreamiit nunatta avannaanut ungasippalukkaluartoq, tv-kkulli aallakaatitassiortunut sydkoreamiunut taamaanngilaq. Taakkua Sverigimi, Islandimi Kalaallit Nunaanilu nerisassat mikiarsiarineqartartut pillugit aallakaatitassiorput. Kiviaq tusaamasaasoq filmiliorniarlugu usserniarlugulu angalaarsimapput.
Sydkoreameersoq Nuummi najugalik Ilisimatusarfimmilu atuartoq, Kim Insuk, aallakaatitassiortunut ataqatigiissaarisutut sulisimasoq, piniartut angallaqatigilluarsimanerat oqaluttuaraa.
- Kalaallit Nunaanni kiviaq sammivarput, Siorapalummi appaliarsunniartut ilaaffigaagut. Piniareeratta uterluta qanoq kivialiortarnersut takuarput, Kim Insuk oqarpoq.
Kiviaq tassaavoq avanersuarmiut mamartuutaat. Appaliarsuit puisip amianut poortuuteriarlugit, puisip amia mersoriarlugu qaammatit pingasuniit arfinillillu akornanni qappiortinneqartarput. Taava neriinnarianngussapput.
Koreamiut nunarput issittumilu nunat ukiuni kingullerni soqutigineruleraat, Kim Insukip malugisimavaa. Taassumalu sila pissusiata allangoriartornerata tusagassiuutini takussaanerulernerat pissutaasoraa.
Piviusulersaarut Koreami tusagassiorfiup Mokpo MBC-ip decemberimi aallakaatinneqassasoq naatsorsuunneqarpoq.