Korea Avannarleq Korea Kujallerlu højtalerinik isumaqataalersitsiniutinik ikkussueqqittut
Korea Avannarleq Korea Kujallermut killeqarfiup nalaanut højttalerinik, Korea Kujallermi isumaqataalersitsiniutinik siammarteriniarnerminnik atukkaminnik, ikkussuilersimavoq.
Korea Kujallermi nutaarsiassaqartitsivik Yonhap taama allaaserisaqartoq, nutaarsiassaqartitsivimmit Reutersimit issuarneqarpoq.
Korea Kujalleq akerlianik isumaqataalersitsiniutinik siammarteriniarnerminnik atukkaminnik, Korea Avannarlermut killeqarfiup nalaani sapaammi aamma ikkussuilersimavoq.
Korea Avannarlermiut qullartaasianik eqqakkanik immerneqarsimasunik, Korea Kujallermut killeqarfimmit Korea Kujalliup tungaanut aallartitsiuaannarniarpat Korea Kujallermi illersornissaqarfiup taamaaliulersaarnini siumut aarlerisaarutigaa.
Qullartaasiammi eqqakkanik immerneqarsimasut Korea Avannarlermit Kujallermut sapaatit akunnerisa kingulliit ingerlaneranni qangattartinneqartarsimapput.
Qullartaasiat eqqakkanik immerneqarsimasut 310-t Korea Kujallermut killeqarfiata tungaanut sapaammit ataasinngornerup unnuani aallartinneqarput. Korea Kujallermi illersornissaqarfik taama nalunaaruteqartoq, nutaarsiassaqartitsivik Yonhap allappoq.
- Qullartaasiat Korea Avannarlermit Kujallermut sapaammi unnuakkut aallartinneqartut eqqakkanik pappialaasunik plastikkiusunillu immerneqarsimapput. Akoorutissat toqunartuusinnaasut qullartaasianiissimanngillat, Korea Kujallermi illersornissaqarfiup qullersaat Yonhap naapertorlugu ilaatigut oqarput.
Korea Kujalleq qullartaasianik Korea Avannarlermut aamma aallartitsisarsimavoq. Qullartaasiat taakkua mappersakkanik Korea Avannarlermut akiniutitut oqaasertalersukkanik ilaatigut immerneqarsimapput.
Qullartaasianik tamakkuninnga aallartitseqattaarnerit Korea Kujalliup Avannarliullu akornanni pissutsinik najummassimanareertigisunik ajornerulersitsiinnarsimapput.
