Suleqatissat nutaat 17-it: Kommuneqarfik Sermersuup Danmarkimut kissaatigai

DR-ip piviusulersaarutaa TV-kkut upernaaq takutinneqarnerata kingorna Kommuneqarfik Sermersuup meeqqanik inuusuttunillu sullissinera isornartorsiorneqangaatsiarpoq.

Tamatumalu malitsigisaanik naalagaaffimmit ikiorneqarnissaq noqqaassutigineqalerpoq. Ikiorneqarnissamillu kissaatit isumaginninnermut naalakkersuisumut tunniunneqaqqammerput.

AAMMA ATUARUK Isumaginninnermut siunnersortit qassiuneri ilisimaneqanngilaq

Imaannaanngeqaarli, tassami tarnip pissusaanik ilisimasallit isumaginninnermilu siunnersortit qassiuneri nunatsinni ilisimaneqanngillat pisariaqartitallu qassiuneri siornatigut paasiniarneqarsimanatik.

Taamaammat kommunit  maajip naajartulernerani piumaffigineqarput kissaatitik juulip 15-iani isumaginninnermut naalakkersuisoqarfimmut nassiutissagaat. 

- Isumaqarpunga ajunngitsuusoq kommunimi tamakkiilluta ataatsimut suleqatigiinnissatsinnut aamma ineriartortitseqqinnissatsinnut periarfissinneqassagatta, immaqa aamma taanna socialstyrelse pilersinneqarnikuuneranik tamakku aamma peqqutaanikuugaluarput, Meeqqanut ilaqutariinnullu ingerlatsivimmii pisortaq Martha Lund Olsen oqarpoq.

AAMMA ATUARUK Tarnip pissusaanik ilisimasallit qassit pisariaqartinneqarnersut ilisimaneqanngitsoq

Kommuneqarfik Sermersuummi inunnik sullissisut 17-it amigaatigineqartut nalunaarutigineqarpoq.

- Taamatut ikiorserneqarsinnaagutta neriuutigaarput socialfagundersøgelsenut suliagut meeqqanut ataasiakkaanut tunngasut tamaasa pigilersinnaassallugit taamaalilluta suliatsinnut suliassatsinnullu kinguaattoorutigut malinnaaffigisinnaalerlugit, Martha Lund Olsen oqarpoq.

Suliassat allaffissornikkut ingerlanneqarsimannginnerat peqqutaalluni ilaatigut sulianik kinguaattoortoqarpoq. Meeqqanut ataasiakkaanut suliat isumaginninnikkut pilersaarusiugaanatik suliassamullu pilersaarusiorneqarsimanngillat

Atorfiit aalajangersimasut kommunip kissaatigisai makkuupput:

• Tasiilamut isumaginninnermut siunnersorti sisamat                                                     

• Nuummi suleqatigiillutik misissuisartunut  isumaginninnermi siunnersortit tallimat
• Nuummi inissinneqarsimasut pillugit suleqatigiinnut isumaginninnermi siunnersortit sisamat
• Paamiuni isumaginninnermi siunnersorti ataaseq
• Paamiuni tarnip pissusaanik ilisimasalik ataaseq
• Tasiilami tarnip pissusaanik ilisimasallit marluk

Kommuneqarfik Sermersuummi misissueqqissaartartut suleqatigiittussanik sulisussanik amigaateqarpoq. Taakku  pilersaarusiornermik suliaqartussaapput, meeqqallu ataasiakkaat ikiorneqarnissaanik pilersaarusiortartussaallutik. Taakkunanilu isumaginninnermik siunnersortit tallimat pisariaqartinneqarput. 

Meeqqanut angerlarsimaffiup avataanut inissinneqarsimasunut inissinneqartussanullu nalilersuisartussanik sisamanik amigaateqarput. 

Tasiilami meeqqat 952-iusunit 182-it angerlarsimaffiup avataanut 2019-imi maajimi inissinneqarsimapput.  

Kommuneqarfik Sermersuumit isumaginninnermik siunnersortit marluk Aalborgimeersut upernaaq attartorneqarput. Taakku suliassanik misissuitinneqarput misilittagaallu ajunngitsuusut, Martha Lund Olsen nassuiaavoq. 

- Upernaaq Aalborgiminngaanniit ikiortinnitsinni tamanna takunikuuarput. Misilittagaqartunik taamatut sulinermik suliaqartunik maani aamma sulisutsinnut iluaqutaasorujussuupput aamma suleqatigalugit oqaloqatigalugit 'qanoruna iliortartusi?' soorlu taamatut
 

AAMMA ATUARUK Erseqqissumik kisitsisitaliisinnaanginneq pillugu Martha Abelsen oqarpoq: Kommuninit kisitsisit katersorpagut