Tarnip pissusaanik ilisimasallit qassit pisariaqartinneqarnersut ilisimaneqanngitsoq
- Tarnip pissusaanik ilisimasallit arlalinni pisortani namminersortunilu atorfeqarmata pisariaqartitsineq pillugu tamakkiisumik paasissutissaqanngilaq.
Ilinniartitaanermut, kultureqarnermut ilageeqarnermullu naalakkersuisoq, Ane Lone Bagger taama allappoq.
Tarnip pissusaanik ilisimasalinnik nunatsinni qanoq pisariaqartitsitigineq pillugu Inuit Ataqatigiinneersup Aqqa Samuelsenip paragraf 37 atorlugu apeqquteqarpoq. Akissutissarsiffiginiagaali naalakkersuisoqarfiup tamakkerlugit akisinnaanngilai.
AAMMA ATUARUK Immikkoortortaqarfimmi Tasiilami pisortap suliniut ilassilluaraat
Aamma tarnip pissusaanik ilisimasallit nunatsinni sulisut qassiunersut nalornissutigineqarpoq.
Tarnip pissusaanik ilisimasallit 53-it Dansk Psykolog Foreningimi nalunaarsugaasut naalakkersuisoq paasissutissiivoq. Amerlassusaalli allaanerusinnaavoq.
- Imaassinnaavoq peqatigiiffimmi ilaasortaanngitsunik tarnip pissusaanik ilisimasalinnik allaqartoq, Ane Lone Bagger allappoq.
AAMMA ATUARUK Kinguaassiutitigut kanngutsaatsuliorfigineqartut pilertortumik ikiorneqartassapput
Taamaammat nunatsinni tarnip pissusaanik ilisimasallit qassit kalaallisut oqaluttuunersut naalakkersuisoqarfiup aamma paasissutissiissutigisinnaanngilaa.
Paasisimasalli amigaateqaraluartut, tarnip pissusaanik ilisimasalinnik amerlanernik pisariaqartitserpasippugut.
- Qanoq annertutigisumik pisariaqartitsisoqarnera pillugu Dansk Psykolog Foreningimut apeqquteqaateqarnermi peqatigiiffik akivo,q utaqqisut nalunaarsorsimanerisa ersersikkaat, amerlanerusunik pisariaqartitsisoqartoq, kisitsimmilli taasinatik, Ane Lone Bagger allappoq, ilanngulluguli oqaatigalugu, ukiumut 5.300-8.000-it nunatsinni tarnip pissusaanik ilisimasalimmit ikiorneqartartut Dansk Psykolog Foreningimit missiliorneqartoq.
