Erseqqissumik kisitsisitaliisinnaanginneq pillugu Martha Abelsen oqarpoq: Kommuninit kisitsisit katersorpagut
Meeqqat inuusuttullu pillugit isumaginninnikkut ajornartorsiutit annertuut qaangerniarnerinut tarnip pissusaanik ilisimasallit isumaginninnermullu siunersuisut qassit atorfissaqartinneqarnersut pillugit isumaginninnermut Naalakkersuisoq Martha Abelsen (S) kisitsisitaliiumanngilaq.
Kisianni erseqqissarpaa Naalakkersuisut Danmarkimut qinnuteqaataanni ikiuutissat kommunit ataasiakkaat pisariaqartitaannut naleqqussaneqassasut.
- Tasiilaq pillugu aallakaatitassiaq piviusumik tunngavilik "Byen hvor børnene forsvinder" DRip aallakaatippaa.
- Tassani takutinneqarpoq Tasiilami meeqqat pingajorarterutaat kinguaassiuutitigut atornerlunneqartut meeqqallu affaat kommunimut suliassiissutigineqartut.
- Aallakaatitassiap piviusumik tunngavillip Tasiilami nunattalu sinnerani isumaginninnikkut ajornartorsiutit pillugit oqallinneq ingerlateqqilerpaa.
- Pingasunngorneq 22. maaji Naalakkersuisunut illua’tungiliuttut tamarmiusut aamma Naalakkersuisunut tapersersuisut Demokraatit Naalakkersuisunut aalajangigassamik nassiussipput piumasaqaatigalugu: Naalakkersuisut Danmark saaffigissagaat isumaginninnermut tunngasutigut ikiuunnissaat qinnutigissagalugu.
- Ataasinngorneq 27. maaji piumasaqaammut Naalakkersuisut tunniutiinnarput.
- Marlunngorneq 2. juuli Naalakkersuisup Martha Abelsenip (S) danskit nunamut namminermut aamma isumaginninnermut naalakkersuisuat ataatsimeeqatigaa, Danmakimit ikiuineq qanoq isikkoqassanersoq pillugu.
Pisariaqartitammi tassaapput isumaginninnermut siunnersortit amerlanerusut, sullissisut amerlanerusut aamma tarnip pissusaanik ilisimasallit amerlanerusut. Kommunillu namminneq kissaatigisaat Danmarkimik isumaqatiginninniarnermut tunngaviussapput, Martha Abelsen oqarpoq.
- Kommunini tallimani, illoqarfinni 17-ini inoqarfinnilu 74-ini pisariaqartitat assigiinngitsorujussuupput, oqarpoq.
Danskit ministeriinik ataatsimeeqateqarneq
Danskit isumaginninnermut ministeriat Astrid Krag aamma inatsisinik atuutsitsinermut ministeriat Nick Hækkerup ataatsimeeqatigalugit sapaatip akunnera kingulleq Danmarkimiippoq. Inatsisartuni amerlanerussuteqartut ilungersortumik tatisinerat ataatsimiinnermut tunngaviuvoq, amerlanerussuteqartut Naalakkersuisut pinngitsaalivaat Danmarkimut saaffiginneqqullugit isumaginninnerup tungaatigut ikiorneqarnissamik qinnuteqaqqullugit
Taamaakkaluartoq ullumikkut Kaaallit Nunaanni tarnip pissusaanik ilisimasallit isumaginninnermullu siunnersortit qassiunersut erseqqissumik ilisimaneqanngilaq – aamma qassit pisariqartinneqarnersut erseqqissumik ilisimaneqanngilaq.
Meeqqat Ikiortigit siulittaasuat tarnillu pissusaanik ilisimasalik namminersortutut ingerlatsisoq Jonna Ketwa naapertorlugu minnerpaamik 150-it atorfissaqartinneqarput. Massakkorpiaq nunatsinni tarnip pissuaanik ilisimasallit 50 missaanniittut sulipput.
AAMMA ATUARUK Isumaginninnermut siunnersortit qassiuneri ilisimaneqanngilaq
Kisianni kisitsisit taakku pillugit Naalakkersuisoq Martha Abelsen oqaaseqarnianngilaq. Tasiilami inummit tarnip pissusaanik ilisimasalimmik kalaallisut oqaloqateqarsinnaanginnerminik qatsussisimasumit akissutisiani innersuussutigaa: Oqaloqartigiinneq tamarmi nutserisoqarluni ingerlanneqarpoq. Pisumi taamaattumi iluaqutaanngilaq Danmarkimit tarnip pissusaanik ilisimasallit tallimat illoqarfimmut nassiutissallugit, Martha Abelsen erseqqissaavoq.
Pisariaqartitanik paasinninneq
Massakkuli – kommunit peqatigalugit – ilinniarsimasunik qassinik atorfissaqartitsisoqarnersoq paasiniassavaa. Tamannalu massakku pissaaq, politikkikkut isumaqatigiinniarnerit ingerlanerini. Piffissarlu eqaarsaatigalugu Naalakkersuisoq isumalluarpoq:
Qallunaat naalakkersuisui massakkut utaqqigallassavagut, kissaatigut tigoreerpaat taava taakkua aallaavigalugit utertitsippata isumaqatiginninniarnerit aatsaat toqqaannavittumik aallartittussaagamik, oqarpoq.
AAMMA ATUARUK Tarnip pissusaanik ilisimasallit qassit pisariaqartinneqarnersut ilisimaneqanngilaq
Ilinniarsimasunik qassinik pisariaqartitsisoqarnersoq pillugu sooq siusinnerusukkut paasiniaasoqarsimannginnera Martha Abelsenip oqaatigisinnaanngilaa
- Uagut tungitsinninngaanniit taamaallaat nutaatut siunissaq ungasinnerusoq eqqarsaatigalugu isumaginninnermi iliuutsit qanorlu naammassinninnerit uuttorneqarsinnaanngorlugit nalilersuiuaannarnissamik pisariaqartitsineq eqqartortorujussuuarput, Martha Abelsen oqarpoq.
Isumaginninnermut siunnersortit peqatigiiffiat Niisip massakkorpiaq 30 missaannik ilaasortaqarnerarpoq. Kalaallit Nunaanni Dansk Psykologforening 50 missaannik ilaasortaqarpoq.