Kommuneqarfik Sermersuumi sulisut sulinermut atatillugu oqarasuaatini angallattakkaminni TikTok piissavaat
Sulinermut atatillugu oqarasuaatit angallattakkani Tik Tok peerneqarnissaa kingullertigut oqartussani assigiinngitsuni inassutigineqarlunilu kajumissaarutigineqartaqattaarpoq.
Qarasaasiat isumannaatsuunissaannik sullissivik, Center for Cybersikkerhed, Kalaallit Nunaanni oqartussanut kajumissaarivoq inoqatinut attaveqaat aliikkutaanerusoq kinamiunit pigineqartoq pillugu iliuuseqassasut.
Maannakkullu Kommuneqarfik Sermersooq iliuuseqarluni ilaaqquppoq.
Kommunemi sulisut sulinermut atatillugu oqarasuaatini angallattakkaminni Tik Tok piissavaat, aammattaaq sulisut sulinerminnut atatillugu mailiminnik namminneq oqarasuaat angallattakkaminnut atassusersimasunut atuuppoq.
Attaveqaqatigiinnermut pisortaq, Lars Damkjær, KNR-imut mailikkut taama allappoq.
Tik Tok-imut atatillugu isumannaallisaanerup innarlerneqannginnissaata qulakkeernissaa peqqutigalugu taamatut aalajangertoqarpoq.
Qarasaasiat isumannaatsuunissaannik sullissivik, Center for Cybersikkerhed, aallaavigalugu Tik Tok pisinnaatitsinermut paasissutissannik suliassaqarfimmullu isersinnaanermik assut qinnuiginnittarsimasoq paasissutissiivoq, taamaalilluni app´eq paasissutissarpassuarnik katersisissinnaalersillugu, kinamilu aqutsisunut ingerlateqqiisinnaalluni.
Peqqussutit unammillernartullu
Kommunep paasissutissaatai pillugit Kommuneqarfik Sermersooq illersuinissaq peqqutigalugu taama aalajangerpoq.
- Kaammattuutigissavarput sulisutta aamma Tik Tok app'ertik namminneq mobiliminniit piissagaat, imminnut isumannaatsuutinnissaat aamma inuttut paasissutissaataasa illersornissaat eqqarsaatigalugu,
Pisortaqatigiit taama allapput.
Matumani mianersoqqussutip tamanit pimoorullugu tiguneqarnissaa kaammattuutigaat aammattaaq namminneq inuttut paasissutissaatit sulinermilu paasissutissat pisariaqartumik iliuuseqarfigeqqullugit.
Sapaatip akunnerata siuliani Digitalimi Sullissinermut Aqutsisoqarfik nalunaarpoq qeqqanit ingerlatsisut Qarasaasiat isumannaatsuunissaannik sullissiviup Tik Tokip sulinermut atatillugu oqarasuaatit angallattakkaniit peerneqarnissaannik kajumissaarilluni.
Kiisalu Tiktokip sullisigalugit oqarasuaatini attaveqaatinilu attuinnarlugit aquttakkani ikkusimannginnissaa Naalakkersuisuni ilaasortanut naalakkersuisoqarfinnilu sulisunut tamanut aamma innersuussutigineqartoq, Naalakkersuisut KNR-imut paasissutissiipput.
