Nunatsinni naalakkersuisoqarfinni aqutsisoqarfinnilu sulisut tamarmik TikTok sullisigalugu oqarasuaatiminniit piissagaat
Namminersorlutik Oqartussani qitiusumik ingerlatsiviit illersornissaqarfiup isertortumik paasiniaasartuisa nittartakkakkut pisunik misissueqqissaartarfiata, tassa Center For Cybersikkerhedip TikTok sullisigalugit oqarasuaatiniit attaveqaatiniillu attuinnarlugit aquttakkaniit peerneqarnissaanik inassut malissagaat, Digitalimik Sullissinermut Aqutsisoqarfik sisamanngornermi aalajangerpoq.
Digitalimik Sullissinermut Aqutsisoqarfiup pisortaa, Katrine Hjelholt Nathanielsen, KNR-imut taama allappoq.
Tassalu tamaaliornissaq inassutaajunnaarluni peqqussutaalerpoq.
Sioorasitsissuterujussuarsinnaasoq
TikTok sullisigalugu atortorissaarutiminniitinnissaa qallunaat oqartussaqarfiini sulisunut inassutiginngikkini Center for Cybersikkerhed februaari naalersoq nalunaarpoq.
Aamma inassut taanna nunatsinnut nassiunneqarsimasoq, taavalu Center for Cybersikkerhedip kalaallit oqartussaat inassummut isummeqqullugit kaammaattuisoq, Sermitsiaq ataasinngormat allappoq.
Center for Cybersikkerhed KNR-imut mailikkut ima akivoq:
- Kilitsissiat qarasaasiatigut Danmarkimut saassussisinnaaqisut, CFCS naliliivoq. Ingammik Ruslandimiit Kinamiillu sioorasitsiuarput qarasaasiatigullu Danmarkimut saassussiuarlutik. Kalaallit Nunaat aamma taamakanneq pineqarpoq, taannalu pissutigalugu CFCS-ip kalaallit oqartussaasui TikTok pillugu inassumik ilisimatippai.
Kinamiut appiutaat atuisup sumiissusia, attaaveqarfii, nittartakkanik atuinera allallu pillugit paasissutissanik tigooraasartoq, Center for Cybersikkerhed allappoq.
Tamatuma saniatigut appip atorneqarnermini mikrofoni assiliissullu aqulertarpaa.
Peqqussut qaninnerpaakkut atuutilissasoq, oqartussaqarfiillu atuutilersitsinisssamik sulissutiginnittut, Digitalimik Sullissinermut Aqutsisoqarfik KNR-imut allappoq.
