Kommuneqarfik Sermersooq soraarninngorsimasunik meeqqerivinni sulisoqarnerunissaanik kissaateqartoq
![](/sites/default/files/styles/image_934x467/public/2024-06/Kaalat%20Olsen%20Hansen.jpg?h=29666c77&itok=5OWFs1Wp)
Ulluinnarni suliassanik isumaginnittussat ulluunerani paaqqinnittarfinni amigaataapput. Tamanna sulisuusunut ulapitsitsIsupilussuusarpoq.
Kommuneqarfik Sermersuumi perorsaasut 107-iussasut aalajangigaavoq, kommunilli ulluunerani paaqqinnittarfiini perorsaasutut atorfillit 47-nnaapput.
Taamaammat soraarninngoreersoq Kaalat Olsen Hansen meeraaqqeriviutigaluni meeqqerivimmi Puiami piffissap ilaannaani sulisarnissaminik qinnuteqarnissaminik aalajangerpoq.
Taama aalajangernera kommunimit nuannaarutigineqarpoq.
- Nuannaarutigeqaarput Kaalat Olsen Hansen angerlarsimaannarnani suleqqikkkusulluni meeqqerivimmut saaffiginnissimmmat, Kommuneqarfik Sermersuumi meeqqerivinnut immikkoortortami aqutsisoq, Ane Marie Lynge Møller oqarpoq.
![](/sites/default/files/styles/image_934x467/public/2024-06/Ane%20Marie%20stills.00_01_24_09.Still001.png?itok=bopHSGZi)
Ulluunerani paaqqinnittarfik Puiaq soraarninngoreersumik iluatsilluartumik sulisoqaleraluartoq, soraarnerit piffissaq tamakkerlugu sulisuunissaat periarfissatut isigineqassanngilaq.
- Soraarninngoreersunut piffissaq tamakkerlugu, soorlu sapaatit akunneranut 40 tiimit sulisussanngorlugit atorfinitsitsinissamut nittarsaassinavianngilagut, kisianni soorlu vikaritut sulinissamut qanoq tiimit amerlatigisut sulerusunnera tunngavigalugu namminneq isumaqatiginninniarnikkut Kommuneqarfik Sermersuup nittartagaa aqqutigalugu neqeroorutiliorsinnaavugut, immikkoortortami aqutsisoq oqarpoq.
Akissarsiat pingaaruteqartut
Qangalili sulisussaaleqisorujussuaqarpoq, tamannali ataatsimik iliuuseqarnikkut immaqa allanngortinneqarsinnaasoq, Ane Marie Lynge Møller oqarpoq.
- Ullumikkut aqutsisooreersut sulisullu uagutsinnut paaasissutissiiissutigisartagaat tassaavoq akissaatimikkut qaffaavigineqartuuppata, taakku aamma inisseeqataasinnaasut, Ane Marie Lynge Møller oqarpoq.
Taassuma oqarnera naapertorlugu, ulluunerani paaqqinnittarfinni sulinermi akissarsiat ikigineqarmata, perorsaasutut ilinniarsimasut perorsaasunullu ikiortit arlallit ulloq unnuarlu paaqqinnittarfinni sulinissartik aalajangertartarpaat.
Kaalat Olsen Hansenilli ulluunerani paaqqinnittarfimmiinnissani toqqarpaa. Meeqqerivinnilu sulinera pillugu nersualaarneqarpoq.
- Assorujussuaq taanna iluarivarput, sulisullu akornanni ikorfartorutaalluarpoq. Ullumikkut takutippaa qanoq iluaqutaatiginersoq, Ane Marie Lynge Møller oqarpoq.
Perorsaasutut ilinniarfissap ulluunerani paaqqinnittarfinni sulisoqarnerulernissaanik sunniuteqarsinnaanissaa Ane Marie Lynge Møllerip aamma neriuutigaa.