Qamittoorneq: Kommunemi politikerit pilersaarummik piareersimasuuteqaqqusisut

Nuuk arfininngornermi decembarip 28-ni qamittoormat 15-inik issippoq, kingullermillu taama qamittoorneq 2021-mi pivoq.

Taamanilu qamittoorneq ilinniutaasimassasoq ilimagineqarsinnaagaluarpoq, decembarilli naalernerani qamittoornerup nalaani paasissutissat kommunemeersut imaaliallaannarluni nassaassaanngillat.

Kommuneqarfik Sermersuumi kommunalbestyrelsemi ilaasortaq, Peter Davidsen (S), taama isumaqarpoq.

- Isumaqarpunga Nukissiorfinninngaanniit paasissutissat erseqqissut, sukkasuumillu nittartakkakkut saqqummiussinerat ajorinngilluinnarpara. Upalungaarsimanermut tunngatillugu qatserisartuni sulineq aamma isornartussaqartinngilara, ajunngilluinnartutullu nalilertariaqarlugu.   

Qamittoortoqaqqinnissaani innuttaasut toqqissisimasinnaaqqullugit kommune piaartumik paasissutissiisariaqartoq, Peter Davidsen (S) isumaqarpoq.

- Kisianni uagut kommunitut innuttaasunut erseqqissumik nalunaaruteqarnerput kingusippallaalaartukkut pigami, taamaammat ilai nalornipput sumi oqquiffissaqarnerlutik.  

Nuussuarmi atuarfik kommunep kialaarfissatut ammagaa Peter Davidsenip assersuutigaa.

- Nuussuarmi oqquiffissaq ikinneqaraluarpoq, kisianni aggertoqanngilaq inuit nalugamikku. Nalunngilara kommunemi sulilluartut, kisianni piaartumik iliuuseqartarnissarput uani kissaatigivara, taanna oqarpoq.

Siunnersuut nutaaq, pilersaarut nutaaq

Taamaammat Peter Davidsen illoqarfimmik ineriartortitsinermut sanaartornermullu ataatsimiititaliami siulittaasunngorlaaq, Uju Petersen (IA), peqatigalugu taamatut qamittoortoqaqqinnissaani iliuusissanik pilersaarusiortoqartariaqarnera siunnersuutigaat.

- Uagut siunnersuutitsinni eqqarsaatigaarput innuttaasunut assigiinngitsunik paasissutissanik erseqqissunik tunniussinissaq. Soorlu uani eqqarsaatigivarput taamatut qamittoortoqartillugu sumut oqquiartussaanga? Illoqarfimmi, Nuussuarmi Qinngutsinnilu oqquiffissat sumiissappat? Paasissutissat innuttaasut kommunillu akornanni erseqqissarniarlugit taamatut siunnersuuteqarpugut, Peter Davidsen oqarpoq.

Taassuma saniatigut innuttaasut namminneq angerlarsimaffimminniiginnarusukkunik qanoq iliornissaannik kommune siunnersuutissanik piareersimatitaqallaquneqarpoq.

Upalungaarsimasunik oqilisaassineq

Taama siunnersuuteqarneq upalungaarsimasut qamittoortoqarnerata nalaani sulinerannik isornartorsiuinertut paasineqassanngitsoq, Peter Davidsen oqarpoq. Upalungaarsimasulli sulilluarsimammata nersualaarpai.   

Kommunelli nammineq pilersaarusiai iluaqutaasussaapput; aamma upalungaarsimasunut.

Kommune qanoq akisussaaffeqartigissava, aamma upalungaarsimasut qaqugukkut paasissutissiinerat pitsaanerussava? Taakkumi Nuummi illorsuaq timersortarfik oqquiffissatut ammarpaat.

- Upalungaarsimanermut tunngatillugu suliaqartut suliassanik annertuunik ingerlataqareerput, taakkulu ingerlataannik uagut kommunitut tapersersuisinnaavugut pitsaasumik avammut paasissutissiisarnerput ingerlakkutsigu.  

Siunnersuut illoqarfimmik ineriartortitsinermut sanaartornermullu ataatsimiititaliap pingasunngornermi januaarip 22-ni ataatsimiinnerani akuerineqarpoq. Kommunemilu ingerlatsisut maanna pilersaarusiorlutik aallartipput, pilersaarusiarlu kommunalbestyrelsep kingusinnerusukkut akuerissavaa.