Qamittoorneq – Nuuk issittoq, taartoq aaqqiissuteqarallarfiusorlu

Nalunaaquttap qulinngoriartortoq Nuummi juullip ulloriai qaminneqarput. Akunnerimmi 14-it tungaannut - Nuussuullu ilaani aqaguata tungaanut innaallagissap kiassarnerullu qamittoornerat aallartippoq.

Unnukkut taarsimmat aqquserngit biilit qulliinit qaammarneqarput. Biilertut ilaat asasaminnut nerisassanik immaqa pajupput, ilaallu kissasserniaannarlutik.

Sila 15-inik issittoq aqqusininnguit inoqanngiivipput. Inuilli ilaat Vandsøvejimukaarlutik taartuinnarmi tassaapput.

Inuit qiiasut, ulloq naallugu nerisimanngitsut, ineqarfimminnilu elevatorit atorsinnaanngimmata iniminnit anisinnaanngitsut allagaat Facebookikkut takussaapput.

Kalaallit Nunaanni Politiit Timersortarfimmi kialaarfimmik pilersitsisoqarsimasoq unnukkut nalunaaqutaq arfineq-marlunut tanneq qulingiluanngortoq nalunaarutigaat.

Timersortarfimmi pooqattaq aappaluttoq innuttaasut tiitorlutik imaluunniit kaffisorlutik kissassernerminni atorsinnaasaannik tæppenik imaqartoq matup eqqaaniippoq. Assi © : KNR / Markus Valentin

Tæppinik ulissimasut akornanni

Aput upalungaarsimasut kalerrisaarinermi qulliinit sungaartumik qaamavoq, angutit qernertunik atisalersorsimasut qaammartartunik tassermiorineqartartunik atorlutik timersortarfimmut isertarlutillu anisarput, soorlu tassa filmimi pissanganartuliami.

Kialaarfeqarnera kalerrinneqarsimasunut taamaallaat ersarippoq.

MAtut ammarneqarmata upalungaarsimasunit angutit tikilluaqqusinissamut piareersimapput:

- Iserlutit kissasserit. Tæppeqarpoq, teeqarpoq kaffeqarlunilu, angutit ilaat oqarpoq.

Angut atallaalerluni najoqqakkaminik kissartumik tigummiarpoq. Assi © : KNR / Markus Valentin

Ini tarrajuppoq, politiilli Facebookikkut nalunaaruteqarneranit minutsit 30-t qaangiutiinnartut inoqarlualereerpoq.

Inip qeqqani juullimut orpiliaq meterinik takissuseqartoq qalipaateqanngitsunik qulleeraqartoq qaammaqqutaavoq. Init sinaanni projektorit iikkanut qaqortunut saqqarsimapput, qaamaneq taamaalilluni qinngorneqartinneqarsinnaalluni, nerriviit tamarmik naneruusersorsimapput.

Isaarissap eqqaani pooqattami aappaluttumi tæppit qaqortut imusimapput, talerpianilu qaatiguut atisaasivimmut ilineqarsinnaallutik – periarfissarli taanna atorneqanngilaq, kialaarfimmi kiassaasersugaanngilaq.

Naak nerriviit pingasut ilaqutariinnik ikinngutigiinnillu ulikkaarsimagaluartut ini nipaappoq. Inimi naammagittaalliortoqanngilaq, isersimasulli tamarmik nukissaqarniaannarput. Inimili qallersukkanik allanilluunniit nerisassanik neriuuteqartoqarpoq, ajoraluartumik nerisassaqarani.

Inuit tallimat eqimattanngorlutik teqeqqup tungaaniipput. Taakkunannga pingasut peqqissaasuupput Aasianneersut ullaajugaa Nuummut tikissimasut.

- Hotel Nordbomi najugaqartussaavugut. Kisianni matut elektronimik parnaartagaammata inissatsinnut isersinnaanngilagut. Pisuttualaassanersugullu aperisoqarpoq, Hanne Kokholm oqarpoq.

- Matumukaratta kialaarfeqartoq paasivarput. Upalungaarsimasullu isiinnarsinnaasugut kaffeqartorlu oqarfigaatigut. Taamaammat tamanna pitsaasuusoq eqqarsarpugut.

Hanne Kokholm illoqarfiit pingaarnersaannut sarfaarussimasumut qanorlu tamanna sivisutigissanersoq apeqquserneqaqqasumut ullaakkut tikippoq. Taanna nalunaaqutaq arfineq-marlunngortoq ullormut siullermeertumik iffiamik ilisarinngisaminit qallersorneqarsimasumik tamusserpoq. Assi © : KNR / Markus Valentin

Hannep saamiata tungaani Rosa Veile issiavoq, taassuma tullermut asanninneq takutinneqartoq qujassutigipallappaa.

- Ullumikkut nerisaqarnikuunnginnatta Tanja naapikkatsigu iluatsitsivugut, taassuma inigisaminut iffianik aalliuppaatigut, taanna oqarpoq, nerriviullu aappaata tungaanut sikiimilluni ilassilluni.

Nerrivimmi sarfaaruteqqasoqarnerani katittoqanngitsoq qujanartoq oqaluuserineqarpoq.

Kisianni aappariit Ellen aamma Miki Poulsenip Hotel Nordbomi tamanna misigaat.

Naak ulloq unamminaraluartoq katinnissaannillu kinguartitsisoqaraluartoq qaaqqusat Hotel Nordbop neriniartarfianni ajunngivipput. Katittullu Ellen aamma Miki Poulsenip immiartorfiit aviluarpalunnerat tusaanngitsunngilaat. Assi © : KNR / Markus Valentin

Naneruusersorsimasumi katittut

Katittunut qaaqqusat qulleeqqanik batteritortunik, naneruutinik, kransekagenik pullartanillu isigisaqarsinnaapput meeqqallu – uninnganatik – nerriviit akornanni arpaqattaarlutik pinnguarput.

Akunnittarfimmi manageri, Mads Mitchellip oqaatigaa: "katittut ikinngutaasalu ajoriffissaqartinngilaat. Tamannalu kalaallit qanoq naammagittallaqqitsiginerannik ersersitsineruvoq."

Igaffimmili uivertoqarneruvoq. Tassanimi katittut igasorlu nalunaaqutaq arfineq-marlunut tanneq qulingiluanngortoq aaqqiissuteqarnissaq pillugu oqaloqatigiilertorput.

Arfineq-pingasunngortinnagumi sarfanittoqanngippat katinneranni nalliuttorsiorneq aqaguanut kinguartinneqartariaqarpoq.

Qaaqqusat arlallit aatsaat siullermeertumik nunatsinnut tikeraarput, qaaqqusalli tamarmik naammagittarluarput. Qaaqqusiffik naneruutinik qulleeqqanillu batteritortunik kusassaasoqapallappoq. Assi © : KNR / Markus Valentin

Nulianngortoq, Ellen Poulsen ullup qanoq ingerlasimaneranik aperineqarami pissutsit sivikitsumik illaatigitallappai.

- Ulapinnalaarpoq, kisianni ajunngiivippoq. Ullaaq (uissaq aaqq.) uffarnialersoq aallartippoq. Kisianni nutsat, pinnersaatit atisallu aaqqissornissaannut qaammartartut atorluarneqarput.

Katinnerata nalliuttorsiutigineqarnerata ullup tullianut kinguartinneqarneranik inerneqarpoq, qaaqqusallu katittunik nalliuttorsiutiginneqqittussanngorlutik – tamatumuunali imeruersaatinut nerisassaqartitsisoqassaaq.

Nuummi ineqarfiit ilaanni kiassarneq aqaguata tungaanut utaqqineqaqqaartariaqaraluartoq ineqarfiit amerlanerpaartaat unnuap-qeqqanngilaartoq sarfaneqqipput.