Kommune Kujallermi Siumumi ilaasortaasimasut: Partiimi imminut takusinnaajunnaarpugut
Kommune Kujallermi qinikkat marluk Siumumit anillutik attaviitsunngorput.
Tassalu Simon Simonsen aamma Karen Marie Kyed Frederiksen.
Taakku tamarmik partiit qullersaqarfianiit ataatsimut anguniagaqarneq amigaatigaat.
- Piumassuseqarlunga suliuartuuvunga, angusaqarusuttuullungalu maani Kommune Kujallermi aamma sulininni, Simon Simonsen oqarpoq, nangillunilu:
- Taamaammat aalajangertariaqarsimavunga taama, anniarigaluarlugu soorunami.
Karen Marie Kyed Frederiksenip Siumumit aninini aamma oqitsuinnaannginnerarpaa.
- Uannut aalajangerneq aamma oqitsuunngilaq, taanna oqarpoq.
Kommune Kujallermi qinikkatut ataatsimoorfeqannginneq Siumumiit anisut piffissami sivitsulersumi ersarissigaluttuinnarnerarpaat.
- Siornatigut Siumut ataatsimoorfiulluni, siunnerfeqarluni, aamma Naalakkersuisuni sulinerminni siunniussatik pimoorullugit, aammalu suleqatigiillutik attaveqarluarlutillu aamma sinerissami ingerlatsisarnerat, taakua soorunami maqaasinarput, Simon Simonsen oqarpoq.
Aalisarnermut inatsit aamma meeqqat atugaat
Simon Simonsenip aalisarnermut inatsisissaq assersuutigaa. Inatsisissaq piffissami kingullermi oqallisigineqangaatsiarpoq.
- Piffissami kingullermi aamma uanga isertuutinngivillugu oqaatigisaqattaarpara aalisarnermut inatsisissap uuma maanna siunnersuutigineqartup taama isikkoqarluni akuerineqarnissaa peqataaffigisinnaanagu, taanna oqarpoq.
Taassuma oqarnera naapertorlugu taanna piviusunngortinneqassaguni kujataani suliffissuarnut eqquisussaavoq.
Siumumi tunuliaqutaasuni eqqissiviilliortoqartoq KNR-ip sapaatip akunnerani matumani saqqummiuppaa. Isornartorsiuisullu arlallit aalisarnermut inatsit tunngavilersuutigaat.
Karen Marie Kyed Frederiksenip meeqqat atugaasa pitsanngorsarneqarnissaannut, peqqinnissaqarfiup allallu pitsanngorsarneqarnissaannut Siumumi anguniakkat piffissami sivitsortumi maqaasisimallugit oqaatigaa.
- Uanga isummanni Siumup politikkerigaluaramiuk una ataatsimoorluta suleqatigiilluta manna nunarput sulissutissagipput. Takorloorpara taamak nunatta ingerlalluarnissaa, taanna oqarpoq.
2021-mi kommunimut qinersisoqarmat Siumut Kommune Kujallermi qinigaaffinnit 15-init arfinilinnik qinigaatitaqarpoq.
Tamatuma kingorna Margrethe Thårup Andersen Demokraatit tunuliaqutaralugit ilaasortangorpoq. Kim Ezekiassenilu Atassummiit Siumumut nuulluni.
Kommune Kujallermi kommunalbestyrelsimut ilaasortat maanna tassaalerput Inuit Ataqatigiinnit arfineq-pingasut, Siumumit sisamat, attaviitsut marluk Demokraatineersorlu ataaseq.
Simon Simonsenip Karen Marie Kyed Frederiksenillu partiit allat mattutinnginnerarpaat.
