Kommune Kujallermi kommunalbestyrelsimi ilaasortat Demokraatertaqalersut

Kommune Kujallermi kommunalbestyrelsimi ilaasortat Demokraatertaqalerput.

Qinersinermimi kingullermi Siumut tunuliaqutaralugu 158 -inik taagunneqarluni ilaasortanngortoq Margrethe Thårup Andersen Demokraatinut ilaasortanngorpoq.

- Qinigaaffiup qiteqqunnerani ataatsimeereernitta kingorna aalajangerpunga Demokraatinut ilaasortanngorniarlunga, taanna KNR-imut oqarpoq.

Taassuma politikkikkut anguniakkaminik Siumumiit tapersersorneqarneq ajornini tunngavilersuutigaa.

- Kissaatiginikuuara ataatsimoorussamik anguniakkanik suliniuteqartassasugut, taannalu amigaatigisimavara, Margrethe Thårup Andersen oqarpoq.

Taanna ataatsimiititalianut inissitsiterinermi borgmesterip sinniisussaata aappaattut inissinneqarpoq. Taassuma saniatigut ataatsimiititaliani marlunni ilaasortaavoq, tassa aningaasaqarnermut inuussutissarsiornermullu ataatsimiititaliami aamma ingerlatasivimmi ilaasortaavoq.

Kommunalbestyrelsimi sulineq allannguuteqassanersoq qaammatip tulliani aatsaat paasinarsissasoq Margrethe Thårup Andersen oqarpoq.

Taassumalu ataatsimiititaliani ilaasortaaginnarnissani neriuutigaa.

- Demokraatinut nuutareeraluarlunga ataatsimiitsitaliani marlunni inissisimavunga. Taanna iluarisisimaarnartorujussuuvoq periarfissaq, aamma neriuutigeqara taamak ingerlaanarnissara.

Siumut ajuusaartoq

Qinersinerup kingulliup kingorna Siumut Kommune Kujalliup oqaluttuarisaanerani siullerpaamik siuttuujunnaarluni illuatungiliuttunngorpoq. Amerlanerpaatigummi Siumut kommunimi siuttuusaraluarpoq.

2021-mi qinersinermi Siumut arfinilinnik ilaasortaatitaqalerpoq, Inuit Ataqatigiit arfineq-pingasunik kiisalu Atassut ataatsimik ilaasortaatitaqalersoq. Tassa imaappoq Margrethe Thårup Andersen Demokraatinut ilaasortanngornissaa sioqqullugu Demokraatit kommunalbestyrelsemi ilaasortaatitaqanngillat.

Margrethe Thårup Andersenip Siumumi ilaasortaajunnaarluni Demokraatinut ilaasortaalernera Kommune Kujallermi Siumup gruppiani siulittaasup Simon Simonsenip ajuusaarutigaa.

- Soorunami ajuusaarutigaarput. Aamma nalunnginnatsigu qinersisai Siumumi qinersisartut, taamaammat aamma taakkua qularnanngitsumik immaqa aamma pakatsilaarsimassapput, taanna KNR-imut oqarpoq.

Kommune Kujallermi Siumut ersarinneruleqqissasoq Simon Simonsenip neriorsuutigaa.

- Ersarinnerusumik politikkitsinnik Siumumiit oqariartuuteqartarnissarput uani qinigaaffiup affaani kingulliup ingerlanerani naatsorsuutigineqassaaq.

Kommune Kujallermi borgmesteri Inuit Ataqatiginneersoq Stine Egede pisoq pillugu KNR-ip oqaaseqartissinnaasimanngilaa.