Kommune Kujalleq: IA Atassullu kommunimi siuttuussasut
Kommunimut apriilip ulluisa arfernanni qinersisoqarneranit nunatsinni kommunini isumaqatigiinniarnerni Kommune Kujalleq kingulliulluni isumaqatigiissuteqarpoq.
Kommune Kujallermi Inuit Ataqatigiit kommunimut qinersisoqarnerani taaguunneqarnerpaapput, Siumumit borgmesteritut atuuttoq Kiista P. Isaksen taamaasilluni borgmesteriugunnaarluni.
Qinigaalluartormi Stine Egede IA-miillu qineqqusaartut sinneri Narsap eqqaani Kuannersuarni aatsitassarsiortoqarnissaanut apeqqut pissutigalugu taaguunneqarluarput.
Inuit Ataqatigiit suliniutip uranimik piiaanermik ilaqarnera pissutigalugu unitsinneqarnissaa sulissutiginiarpaat.
AAMMA ATUARUK Stine Egede: Borgmesteriunissaq toqqarlugu Inatsisartuniinnissaq qininngilara
Stine Egedep Atassut ukiuni tulliuttuni sisamani suleqatigalugu kommuni siuttuuffigisussanngorpaa.
- Qularinngilara Atassut suleqatigilluassallugu aamma nalunngilara Siumut ataatsimiititaliani suleqatigilluartassallugu, Inuit Ataqatigiinnit, borgmesteri Stine Egede tusagassiuutinut nalunaarummi oqarpoq.
Inuit Ataqatigiit kommunalbestyrelsimi atuuffinnit 15-init arfineq-pingasunut qinigaatitaqarput, Atassullu ataasiinnarmik qinigaatitaqarluni.
Siumup oqaloqatiginera iluatsinngitsoq
Kommunimi partiit pingajuat Siumut suleqatigiinnissami ilaanngilaq. Siumut kommunalbestyrelsimi arfinilinnik qinigaatitaqarpoq.
Inuit Ataqatigiit Siumullu isumaqatigiinniaraluarput.
- Piffisarli kingulleq paasinarsivoq qanilliartornata ungasilliartortugut, Stine Egede tusagassiuutinut nalunaarummi oqarpoq.
Taassuma Siumup ataatsimiititaliani tamani marlunnik ilaasortaatitaqarnissaa borgmesterillu tullersortaata aappaatut atuutsitsinissaat ilaatigut neqeroorutigigaluarpaa.
Tamannali Siumup qularutiginngilaa, taamaammat Inuit Ataqatigiit Siumumik oqaloqatiginninnerminik unitsitsivoq.
- Suleqatigiikkusunnerugaluaq iluatsinngimmat uggoraara, kisianni allannguerusulluta qineqqusaarsimanerput piviusunngortikkusukkatsigu tassunga killittariaqarsimavugut, Stine Egede oqarpoq.
Kommunalbestyrelsinngortut arfininngornermi maajip ulluisa aallaqqaataanni ataatsimiissapput inissititerissallutillu.
Stine Egede kommunimut qinersisoqarnerani 410-nit taaguunneqarpoq. Siumumit, Simon Simonsen taaguunneqarnerpaat aappaalluni 229-nit taaguunneqarpoq. Borgmesteriusimasoq, Kiista P. Isaksen Siumumit 186-init taaguunneqarpoq.