Borgmesterip kukkuneq nassuerutigaa: Kommune Kujalliup ilisarnaatini ilisarnaatigiinnassagaa
Ilisarnaatissatut siunnersuutit marluk imminnut assingupput, kisianni isigilluaraanni Find Holgerlu pikkoriffigigaanni kommunip maanna ilisarnaatigeriigaanik taarsiisinnaagaluartut assigiinngissuteqartut takuneqarsinnaapput. Innuttaasut pingaartumillu meeqqat atuartut tassunga uniffiliipput.
Naak borgmesterip, Stine Egedep (IA) kommunip ilisarnaatissaatut siunnersuutit saqqummiullugit kommunip illoqarfiinut nunaqarfiinullu angalareeraluartoq aamma naak nammineq ilisarnaat nutaaq kissaatiginerugaluarlugu kommunip ilisarnaatini aappaluttumik qaqortumillu qalipaateqartoq atuinnassavaa.
Ilisarnaatitoqarmi taasisunit 437-nit 205-init taaguunneqarpoq, nutaatullu siunnersuutigineqartut 128-nik aamma 104-nik taaguunneqarlutik.
Kisitsisit isigilluaraanni kommunimi innuttaasut kommunimi nutaamik ilisarnaatitaartoqarnissaa kissaatigigaat takuneqarsinnaavoq.
Inersimasut meeqqallu 1. klassimiit qummut tamarmik kommunip ilisarnaatitassaanik toqqaasinnaatitaapput. Meeqqalli atuartut taasiartornissamik periarfissamik atuisut amerlanerpaasut, borgmesteri oqarpoq.
Kommunalbestyrelse kukkuluttortoq
Kommunalbestyrelsip siunnersuutinit marlunnit ataasiinnaq toqqarsimagaluarunikku Kommune Kujalleq nutaamik ilisarnaatitaarsinnaasimassagaluartoq takuneqarsinnaavoq.
Stine Egedelu taama isumaqarpoq.
- Kommunalbestyrelsimut oqarnittulli: Eqqarsarluarsimagutta periarfissat marluinnaatissimassagaluarpagut, taamaaliorsimagaluarutta kommunip ilisarnaataa nutaaq ajugaasimassagaluartoq ilimagivara, borgmesteri, Stine Egede oqarpoq, nangillunilu:
- Aallaqqaammulli kukkuluttorsimagatta nassuerutigerusuppara. Kommunalbestyrelsip ataatsimoorluni periarfissat pingasuunissaat aalajangernikuuaat, ilaatigulli taama pisoqarsinnaasarpoq.
Kommunip ilisarnaatitassaatut siunnersuutigineqartut imminnut assingunerat immikkut ugguarnarsimassaaq?
- Aap, soorunami uggornarpoq. Kisianni ilaatigut taamaattoqartarpoq. Tamat oqartussaaqataanerat taamaappoq.
Kommunip ilisarnaataa allanngortikkusukkaluarpiuk?
- Aap allanngortikkusukkaluarlugu isertuutinngilara.
