Atassut Kommune Kujallermi ilaasortaatitaaruttoq: Tapersersorneqarneq amigaatigaara

Atassutip Kommune Kujallermi ilaasortaatitatuani annaavaa.

Kim Ezekiassenimi Atassummi ilaasortaajunnaarluni Siumumut nuuppoq.

- Saninni issiaqatissaqarneq tapersersorteqarnerlu amigaatigisimavara, taakku politikkikkut suliaqarniarninni nukippassuarnik atuiffiusimapput, taanna KNR-imut oqarpoq.

Kim Ezekiassen partiiminit tapersersorneqarnissaminik amigaateqarsimanerarpoq. Siulittaasorisimasaminit maannalu siulittaasuminit Nanortalimmut tikeraarneqarsimanngisaannarpoq, Partiip siuttuinit tikeraartoqarnissaanik neriorsorneqarsimavoq nalulluguli qaqugu kujataanut tikittoqassanersoq. 

Maannalu tassa Kim Ezekiassen utaqqeqqikkusukkunnaarpoq, politikkikkullu sulinermini kiserliortarnini tapersersorneqannginninilu pissutigalugit Siumumut nuulluni.   

- Killiliisariaqalerpunga, taanna oqarpoq.

Taassuma saniatigut Kim Ezekiassen nassuiaavoq Atassutip immikkoortortaqarfiani nutaanik ilaasortanngortoqartannginnera ajornartorsiutaasimasoq siulersuisullu sulinerat unittoorsimasoq.

Siumumut nuuttoq

Kommune Kujallermi kommunalbestyrelsemi ilaasortaq maanna arfineq-pingasut Inuit Ataqatigiinneerput, arfinillit Siumumeerlutik, Kim Ezekiassen taakkununnga ilaalluni, ataaserlu Demokraatineersuulluni.

Margrethe Thårup Andersen marsimi Siumumi ilaasortaajunnaarluni Demokraatinut nuummat Demokraatit kommunemi ataatsimik ilaasortaatitaqalerput.

Kim Ezekiassen attaviitsoorusunngilaq, taassumami oqarnera naapertorlugu Siumumi ilaasortat piffissami sivitsortumi oqaloqatigilluartarsimavai.

- Taamaalillunga attaviitsoorusunnginnama Siumut saaffiginnippunga, tamannalu Siumumit tigulluarneqarpoq, taanna oqarpoq.

Kim Ezekiassen kommunemut qinersinermi kingullermi 95-inik taaguunneqarpoq.

Atassutip siulittaasua Aqqalu Jerimiassen KNR-ip apersorniarsaraa.