Koks ugguartoq: Pitsaassutsip assinga tunniuttassavarput
Neriniartarfiup Koksip iggaviani nunatsinnit pissarititaasunik piffissami aggersumi qalaartitsillunilu puaasartitsisoqarpat Michelinimit marlunnik ulloriannassimaneri ilaassanngillat.
Michelinimiimmi ullorissat nunani avannarlerni neriniartarfinnut pitsaanerpaannut ataasinngormat agguaanneqarput. Ullorli neriniartarfimmut nunarsuarmi avinngarusimanerpaamut nuannernerpaanngilaq.
Koksimmi Michelinimit ullorissat marluk annaavai, tamannalu neriniartarfiup uggoraa.
- Michelinimit innersuunneqartuniikkunnaarnerput soorunami uggornartorujussuuvoq. Tamanna tamatta tulluusimaarutigigaluarparput, Koksip iggaviani pisortaq, Poul Andrias Ziska oqarpoq.
Koks ukiut pingajussaanni nunatsinniippoq, neriniartarfik 2022-mi 2023-milu Michelinimit marlunnik ulloriaqarpoq. Ullorissat marluk siullermik 2019-imi suli Savalimmiuniillutik pissarsiaraat. Tamatumalu kingorna ukiut tamaasa ulloriannaqqittarlutik, ukioq mannali taamaattoqanngilaq.
Iggavimmi pisortap oqarnera naapertorlugu Michelinimit ullorissat ukioq manna amigaataanerat Koksimi pitsaassutsip amigaateqarneranik isumaqanngilaq.
- Pitsaassusaat pisarnitsitulli pitsaatigitippagut. Qaffasinnerusorlu uanga oqaatigisinnaavara. Pitsaaneruleraluttuinnarpugut, ukiut tamaasa pitsaanerulertarpugut, Poul Andrias Ziska oqarpoq.
Savalimmiunut uteqqissasoq
Neriniartarfiup ukioq manna ullorissanik tunniussinermi pitsaassuseq pissutaanani allamik pissuteqarsimassasoq nalilerpaa.
Neriniartarfiullu ulloriaatiminik annaasaqarnissaa naatsorsuutaasimasoq, Pouls Andrias Ziska isumaqarpoq, taassuma siunissap qularnarnera ammasarfiilu inaarutaasumik aalajangernermut sunniuteqangaatsiarsimassasorai.
- Maanna maaneeqqissanata nalunaarutigaarput, Michelinimiillu innersuussineq saqqummertussaavoq. Atuakkatut suli saqqummertarpoq, neriniartarfimmillu piujunnaarsimasumi ilaasoqarnera isumassaqanngilaq.
Koks nunatsinniinnermini ukiut tamaasa aasaanerani qaammatit pingasut pingasut ammasarpoq, ukioq mannalu aamma ammassaaq.
Koksip siunissaa nalunarpoq, kisianni tassa ukioq manna naggataamik nunatsinniissaaq. Tamatuma kingorna Savalimmiunut uteqqissaaq.
- Savalimmiuni aalajangersimasumik inissisimaffissatsinnik piffissami sivisuumi ujartuivugut, tamannalu ajoraluartumik suli iluatsinnani. Suli ujaasivugut, maananli oqarpugut, sumiiffimmik eqqortumik nassaartinnata ammassanngilagut, iggavimmi pisortaq oqarpoq.
Nerisassat immikkuullarissut
Naalli Koksip Michelinimit ullorissat annaagaluarlugit tamanna ukioq manna neriniartarfimmut neriartortussat amerlassusaannut sunniuteqassangatinngilaat.
Neriniartarfiummi nerisassiarisartagaat immikkuullarissuusut iggavimmi pisortaq isumaqarpoq.
- Nerisassiarisartakkagut nunarsuarmi sumiiffinni allani sananeqarneq ajorput. Taamaammat misilinniaraanni Kalaallit Nunaanni misilittariaqarput. Taamaammat arlallit ulloriaqaraluarutta ulloriaqanngikkaluaruttaluunniit misilikkusussagaat suli ilimagaara, Poul Andrias Ziska oqarpoq.
Poul Andrias Ziskalu nunatsinni aasarnissaanut aamma qilanaarpoq.
- Qilanaartorujussuuvugut, taanna oqarpoq.
Neriniartarfik Koks Ilulissat eqqaani Ilimanamiippoq, taanna ukioq manna juunip aqqaneq-aappaani ammassaaq septembarillu arfineq-aappaani matoqqissalluni.