Knud Mathiassenip unnerluunneqarsinnaannginnera atuukkunnaarsinneqartoq

Inatsisartunut ilaasortap, Knud Mathiassenip unnerluussaasinnaatitaannginnerata atorunnaarsinneqarnissaa upernaakkut ataatsimiinnermi ullormi siullermi taasissutigineqassasoq KNR-ip ullumi saqqummiuppaa.

Taanna eqqartuussissutigoortinneqassanersoq politikerit ullup qeqqata kingorna matoqqasumik ataatsimiinnermi taasissutigaat.

KNR-ip partiit pingasut tamarmik atorunnaarsitsiniartut oqaloqatigai. Tassa Inuit Ataqatigiit, Demokraatit Nalerarlu.

Taakku ataatsimut 19-inik qinigaatitaqarput, taamaalillutillu Inatsisartuni amerlanerussuteqarlutik. Taamaalilluni Knud Mathiassenip unnerluunneqarsinnaannginnera atorunnaarsinneqassaaq.

Inatsisartunilu politikerip inatsisinik unioqqutitsisimasutut pasineqarnera pissutigalugu unnerluunneqarsinnaannginnera atorunnaarsinneqarpoq.

Taamaattoqartillugulu Inatsisartuni ilaasortaqatai eqqartuussivilersuunneqarsinnaanissaanut akuersisussaapput. Inatsisartunummi qinikkat unnerluutigineqarsinnaanngitsut, tunngaviusumik inatsimmi allaqqavoq. Unnerluutigineqarsinnaannginnerallu atorunnaarsinneqarnissaat Inatsisartuni taasissutigineqaqqaartussaavoq.

Akuersiuaannarniartut

Naleraq partiimit sorlermiiluunniit ilaasortap unnerluutigineqarsinnaanngissusaa taasissutigineqassatillugu akuersiuaannarniartoq, partiip siulittaasua, Pele Broberg oqarpoq. Inatsisartut eqqartuussiviunngitsut taassuma erseqqissaatigaa:

- Eqqartuussiviup ilumut pineqaatissinneqassanersoq imaluunniit pinngitsuutinneqassanersoq aalajangertussaagamiuk. Taamaammat uagut imarisaa naluarput sooq, kinalu pineqarnersoq oqaaseqarfiginngiivillugu angereersinnaavunga. Inatsisartuni tamatigut aperineqaraangatta angertuaannassaagut, taanna ataatsimiinneq sioqqullugu KNR-imut oqarpoq.

Knud Mathiassenip unnerluutigineqarsinnaannginnerata atorunnaarsinneqarnissaa Demokraatit akuerissagaat, siulittaasup, Jens-Frederik Nielsenip KNR-imut paasissutissiissutigaa.

- Unnerluunneqarnissaanut piumasaqartoqarsimappat taava aqqutissiuuttariaqarparput.

Inuit Ataqatigiit aamma akuersillutik taasisut, siulittaasup tullersortaa, Agathe Fontain KNR-imut oqarpoq.

- Soorunami pisoq ilungersunartutut nalilerparput aamma unnerluutigineqarsinnaannginnermik taasinermi Inuit Ataqatigiit akuersissapput.

Pasilliutigineqartut eqqortuunnginnerarai

Knud Mathiassenip qanoq unnerluutigineqarnera KNR-ip suli paasineqanngilaq.

Taassuma nammineq unnerluussaasinnaannginnini taasissutigineqassasoq Facebookimigut tallimanngornermi ullaap tungaani nammineq uppernarsarpaa.

- Tassa uanga uani pineqarpunga eqqartuussaasinnaannginnera atorunnaarsinneqartussaavoq - aap ilumoorpoq eqqartuussaasussaavunga, kisianni unnerluussutit ilumoortuunngillat. Katsorsartinnera peqqutigalugu maanna sulinngiffeqarpunga - katsorsartinninnili oqaaseqarusunngilanga. Suliartoruma Tusass, IA-mit politikeri allappoq.

Taanna KNR-imut annerusumik oqaaseqarnianngilaq. Facebookikkulli allakkani innersuussutigiinnarpaa.

Agathe Fontainip unnerluutiginninnerit sumut tunnganersut ilisimanagu KNR-imut paasissutissiissutigaa.

Inatsisartut maligassiuisuussasut

Ilaasortat unnerluutigineqarsinnaanngissusaanik atorunnaarsitsinissamut taasisoqarajuppoq.

Inatsisartunut ilaasortaasimasoq, Emanuel Nûko Naleqqameersoq nakuusersimasutut pasineqarami unnerluutigineqarsinnaanngissusaa atorunnaarsinneqarnikuuvoq. Taanna eqqartuussivimmit pinngitsuutinneqarpoq.

Aamma Siumumit Aslak Jensen isumaginninnermik suliaqartumut toqumik siorasaarisimasutut pasineqarluni unnerluutigineqarsinnaanngissutsini atorunnaarsinnikuuaa. Taanna ulluni 20-ni pineqaatissinneqarsimasunut inissiisarfimmiittussanngortinneqassutigaa – pineqaatissiissulli nunatta eqqartuussisuuneqarfianut suliassanngortinniaraluarpaa. Suliarli nunatta eqqartuussisuuneqarfianit suliarineqanngilaq, Aslak Jensenimmi eqqartuussut akueriinnarpaa.

Piffissami kingullermi suliaq arlallit unnerluutigineqarsinnaanngissutsimik atorunnaarsitsinissamut tunngasarnerat Inatsisartunut pitsaanngitsoq, Demokraatit siulittaasuata oqaatigaa.

- Inatsisartutut isigineqarnerput pitsaannginnerulertarpoq taamaammat uggorisorujussuuara aamma uggornartuunera eqqarsaatigalugu soorunami akuerissavarput. Kisianni uggornarpoq inatsisartuni pinerlunnerup inatsisaanik unioqqutitsisarnerit taama akulikitsigilersimammata.

- Inatsisartuni maligassiuisussaavugut inuiaqatigiinnut, taannalu suliaq naammassisinnaanngikkutsigu sumut killissaagut?