Inatsisartuni ilaasortaq Knud Mathiassen unnerluutigineqarsinnaalerataannaasoq

Inatsisartut upernaakkut ullumi tallimanngornermi ataatsimiilerput. Inatsisartunilu ilaasortat ilaata eqqartuussivilersuunneqarsinnaalissanersoq ilaasortaqataasa ullumi matoqqasumik ataatsimiinnermi isummerfigissavaat.

Tusarfivut naapertorlugit isummerfigineqartussaq tassaavoq, Knud Mathiassen Inuit Ataqatigiinneersoq.

Tamanna ilumoortoq, Knud Mathiassenip ullaaq manna qulinngunngitsoq nammineerluni uppernarsarpaa. Taanna Facebookimini ima allappoq:

- Tassa uanga uani pineqarpunga eqqartuussaasinnaannginnera atorunnaarsinneqartussaavoq - aap ilumoorpoq eqqartuussaasussaavunga kisianni unnerluussutit ilumoortuunngillat. Katsorsartinnera peqqutigalugu maanna sulinngiffeqarpunga - katsorsartinninnili oqaaseqarusunngilanga. Suliartoruma Tusass.

Taanna KNR-imut itinerusumik oqaaseqarusunngilaq, Facebookimilu allataminut innersuussilluni.

Inuit Ataqatigiit siulittaasuata tullia, Agathe Fontain, taamaattoqarneranik aamma uppernarsaavoq. Knud Mathiassenimut unnerluussutit sumut tunngasuunersut ilisimanngikkini suliarli taanna naammassineqarniassammat Knud Mathiassenip unnerluutigineqarsinnaannginnerata atorunnaarsinnissaa akueriniaritsik, taanna KNR-imut ilisimatitsivoq.

Inatsisartuni ilaasortaq inatsimmik unioqqutitsisimasutut pasineqaruni unnerluutigineqarsinnaalerataannaasarpoq.

Taamaattoqartillugulu Inatsisartuni ilaasortaqatai eqqartuussivilersuunneqarsinnaanissaanut akuersisussaapput. Inatsisartunummi qinikkat unnerluutigineqarsinnaanngitsut, tunngaviusumik inatsimmi allaqqavoq. Unnerluutigineqarsinnaannginnerallu atorunnaarsinneqarnissaat Inatsisartuni taasissutigineqaqqaartussaavoq.

Naleqqameersoq Emanuel Nûko nakuusersimasutut pasineqarami politiinit unnerluutigineqarsinnaannginnera atorunnaarsinneqarpoq. Taanna eqqartuussiveqarfimmi kingorna pinngitsuutitaavoq.

Aamma Siumumeersoq Aslak Jensen isumaginninnermik suliaqartumut toqutsinissamik sioorasaaruteqarsimasutut pasineqarami politiinit unnerluutigineqarsinnaannginnera atorunnaarsinneqarpoq. Taanna pinersoqqissagaluaruni pineqaatissinneqarsimasunut ulluni 20-ni inissiisarfimmiittussanngorluni eqqartuussaariitsiarluni, tamanna Nunatta Eqqartuussisuuneqarfianut suliareqqitassanngortippaa. Eqqartuussaaninili akueriinnaramiuk suliareqqitassanngorteqqinngiinnarpaa.