Emanuel Nûko nunatta eqqartuussisuuneqarfianut suliassanngortinneqartoq

Tasiilami Eqqartuussisoqarfik Sermersuup Emanuel Nûko nakuusersimasutut pinngitsuutippaa, unnerluussisussaatitaasullu eqqartuussut maanna suliarineqaqqittussanngortippaat.

Allattoq Rune Hvistendal Kristiansen

februaarip 27-at 2023 10:29

Nutserisoq Connie Fontain

Tasiilami Eqqartuussisoqarfik Sermersuup nakuusersimasutut politiillu peqqussutaanik malinnissimanngitsutut februaarip aqqaneq-aappaani pinngitsuutitsinerata kingorna Emanuel Nûko anersaavallaqqalaaraluarpoq.

Unnerluussisussaatitaasulli eqqartuussut maanna suliassanngorteqqippaat, taamaammat eqqartuussivimmi suliaq nunatta eqqartuussisuuneqarfiani suliarineqartussanngorpoq.

Aamma atuarukUnnerluussisussaatitaasut Emanuel Nûkop pinngitsuutinneqarnera suliassanngorteqqissanerlugu isumaliutigigaat

Tamanna Kalaallit Nunaanni Politiit KNR-imut uppernarsarpaat.

SULIAQ EMANUEL NÛKOMUT TUNNGASOQ PILLUGU

Emmanuel Nûko Tasiilami nakuuserniartutut pissusilersorsimanera tamanullu ammasumi toqqissiviilliortitsisimasutut maajip ulluisa 16-ianni 2021-mi unnukkut nalunaaqutaq qulinngoriitsiartoq tigusarineqarpoq. Tamanna unnerluussummi KNR-ip pissariarisaani allassimavoq.

Inatsisartunut ilaasortaq 15-it 20-llu akornanni imigaqarsimasoq unnerluussummi allassimavoq.

Emanuel Nûko tamatuma kingorna inummut allamut nipituuliorluni assortuussuteqartoq, kingornalu arlaleriarluni niaquatigut annersillugulu uppisillugu ajassimagaa, allassimavoq.

Politiit aggersarneqarmata, politiinit eqqissisarneqaraluarpoq, iluatsinngitsumilli.

Taanna nikorfaffimminit nikissanngitsoq marloriarluni politiinit oqarfigineqaraluarpoq. Taannali pinaaserluni politiinut tallini atorlugit annersitsisimasoq unnerluussummi allassimavoq.

Politiit tamanna pissutigalugu qasilitsortalimmik seqqaallutillu tigusarinnipput.

Naleqamit politikeri aamma Inatsisartunut ilaasortaq unnerluussutinut marlunnut Eqqartuussisoqarfik Sermersuumit februaarip aqqaneq-aappaani pinngitsuutinneqarpoq.

Unnerluussisussaatitaasut taassuma ulluni 30-ni pineqaatissinneqarsimasunut inissiisarfimmiittussanngortinneqarnissaa piumasarigaluarpaat.

Unnerluussut naapertorlugu Emanuel Nûko unnerluutigineqarpoq politiit malittarisassaannik unioqqutitsisimasutut Kommuneqarfik Sermersuup malittarisassaanik paragraf 18-ip immikkoortuani 3-mik kiisalu pinerluttulerinermik inatsimmik 88-mik unioqqutitsisimasutut.

Allisiguk

Unnerluutigineqartut tamarmik pinngitsuunerarfigigai

Kalaallit Nunaanni Politiini immikkut ittumik unnerluussisussaataasup, Lars Petersenip oqarnera naapertorlugu Emanuel Nûko pissutsini marlunni unnerluussutigineqartuni pinngitsuutinneqarpoq, aamma naak unnerluussisussaatitaasut suliamut atatillugu naammattunik uppernarsaatissaqarsorigaluartut.

- Pineqaatissiinissamut suliani taamaattoqartuaannarpoq, tassa unnerluussisussaatitaasut unnerluussummik eqqartuussivimmut nassiussigaangamik pasineqartoq eqqartuunneqartariaqartoq isumaqartarpugut, unnerluussisussaatitaasuuneq, Lars Petersen KNR-imut oqarpoq.

Emanuel Nûkop ulluni 30-ni pineqaatissinneqarsimasunut inissiisarfimmiittussanngortinneqarnissaa unnerluussisussaatitaasut piumasaraat.

Emanuel Nûko inummut nakuusersimannginnerarlunilu politiinut annersitseriarsimannginnerarpoq.

- Ajunngilanga, qujavunga suliaq eqqortumik naammassilluarmat. Oqaaseqarnaveersaarnikuuvunga pissutigalugu, allagaatit takoqqaarusunnikuugakkit. Eqqunngitsumillu unnerluunneqarsimallunga paasivara, Emanuel Nûko pinngitsuutinneqarnermi kingorna KNR-imut oqarpoq.

Unnerluussisussaatitaasut suliaq qaqugu Nunatta Eqqartuussisuuneqarfiani suliarineqassanersoq suli nalugaat, Lars Petersen oqarpoq.