KNR qinersisartunut aperivoq: Kim Kielsen IA-lu Naalakkersuisoqatigiissappat?
Isumaqatigiinniarnerit unitsinneqarallarneranni qinersisartut Nuummi pisiniarfissuarmi Nuuk Centerimi radioaviisimit naapinneqartut aperineqarput nunatsinni partiit anginerit marluk suleqatigiissinnaanersut.
Inatsisartut allattoqarfiani partiit torsuusaani ullumi ulapaarfiunngitsoq, illoqarfiit anginersaanni pisiniarfissuarmi niuerniartut, partiit anginerit marluk suleqatigiittariaqaraluarnerannik isumaannik tusarniarpagut, oqaluussattalu amerlanerit kissaatigaat, partiit anginerit marluk suleqatigiittariaqartut.
Naalakkersuisooqatigiilerlik
- Siumut aamma IA-p inatsisartunut ilaasortanngortitai tamarmik aqqaniliupput, nunalu tamaat eqqarsaatigalugu qinigaasut siammasinnerullutik, taava tulluarnerugaluarpoq partiit taakkua marluk isumaqatigiillutik naalakkersuisunngortitsigunik, qinersisartoq Arthur Rasmussen taama isumaqarpoq.
- Partiit qineqqusaaramik tamarmik oqalupput siammasissumik suleqatigiittoqassasoq, Siumut IA-llu partiivini siulittaasut marluullutik nutaajullutik, neriukkaluarpugut imminnut naapissinnaassasut taavalu naalakkersuisunik pilersitsillutik, Arthur Rasmussen oqarpoq.
Aamma atuaruk Naalakkersuisunngortitsiniarluni isumaqatigiinniarnerit ullumi pisussat taamaatiinnarneqartut
Partiit anginerit marluk Naalakkersuisunngortitsippata toqqissimanerusumik tatiginninnerusumillu naalakkersuinikkut ingerlatsilernissaq neriuutigineqarpoq.
- Toqqissisimanerullutik paaseqatigiinnerullutillu ingerlatsilissapput imaasinnaavorlu ingerlallualeriarunik takujartuleraat aperillutillu sumuna ingerlasoqartoq, qinersisartoq Najaaraq Nikodemussen taama isumaqarpoq.
Aamma atuaruk Kim Kielsen: Isumaqatigiinninniarnerit eqqissilluta suliarerujoorpagut
Paornanguaq Reimer Mikkelsen isumaqarpoq IA aamma Siumut suleqatigiilerunik iluaqutitaqassasoq aamma innutaasut toqqissisimanerulissasut qinikkanullu tatiginninneq takkuteqqilluni.
Imminnut naapiffeqanngillat
IA aamma Siumut manna tikillugu isumaqatigiinngittarnerat qinersisartup oqaloqatigissatta maluginiarpaa, taamaattumillu suleqatigiissinnaanerat eqqarsarnartoqartillugu.
- Siumut aamma IA-p suleqatigiissinnaanerat aappaatigut eqqarsarnartoqarrpoq, imminnut naapiffeqannginerat malunnartarpoq, assortuuterujoornersuaq ileqquliutiinnarnikuugunaramikku anguniagaqarpalaanngitsumik pilersoortarput, taamaattumik suleqatigiissinnaanerat ilimagalugulu ilimaginngilakka, qinersisartoq Kunuunnguaq taama oqarpoq.
Inatsisartunut qinersiartoramili Kunuunnguup isumai nikerarput. Siumut IA-lu suleqatigiittariaqartut aappaatigut isumaqarpunga aammali aappaatigut taama isumaqarnanga, Kunuunnguaq oqarpoq.