Naalakkersuisunngortitsiniarluni isumaqatigiinniarnerit ullumi pisussat taamaatiinnarneqartut
Isumaqatigiinniarnerni partiit siunnersuutaat ullup ingerlanerani allaqqissaarneqarlutillu oqaluuserineqassasut, Jørgen Wæver Johansen oqarpoq.
Partiinit tamanit siunnersuutigineqartut ataasiakkaarlugit nalilersorneqassasut, isumaqatigiinniarnermi aqutsisup Kim Kielsenip radioaviisimut ippassaq oqaatigaa.
Inatsisartunut qineqqusaartoqarnerani IA-p aamma Partii Naleqqap piumasaraat, nunatsinni uranitalinnik piiaasoqarsinnaanera pillugu innutaasunik taasisitsisoqassasoq.
Aamma atuaruk Kim Kielsen: Isumaqatigiinninniarnerit eqqissilluta suliarerujoorpagut
Partiinik isumaqatiginniarluni ataatsimiittoqarnerani uranimut apeqqut aporfittut isiginiarnagu Kim Kielsen oqarpoq.
Isumaqatiginniarnerit killiffiannik IA Demokraatit Atassullu oqaaseqarnianngillat, isumaqatiginniarit ingerlalluarnersut taamaannginnersulluunniit.
Inuit Ataqatigiit siulliullutik Siumukkunnik ippassaq ullaakkut ataatsimeeqateqarput tamatumalu kingorna IA-mi siulersuisuunerit ataatsimeereermata qiimmassimaarput erinarsuataarlutillu, taamaakkaluartoq isumaqatiginniarnerit qanoq ingerlasimanerannik oqaaseqartoqarumani.
Atassut kingusinnerusukkut ataatsimiinnissamut aggersarneqanngilaq aggersarneqarnissartillu utaqqimaarumallugu oqarput. Taamatuttaaq Demokraatit ataatsimeeqqinnissamik neriorsorneqanngillat. Demokraatit Siumukkunnik ataatsimeeqateqarnerminni inatsisartunut qinigaatitaat nutaat marluk Nivi Olsen aamma Randi Vestergaard Evaldsen peqataapput.
Isumaqatigiinniarnerit qaqugu aallarteqqinneqassanersut ilisimaneqanngikkallarpoq.
