KNI: Pajuttaatini inuttat ernumassutissaqanngillat
Nunaqarfinnut nioqqutissanik assartuisarnermi angallatini atorneqartuni sulisut toqqissisimanngillat, ukiortaaq aallarnerfigalugu allannguiniarnermi qanoq iliortoqassanersoq tusatsiagaanartigut tusarneqartarmat. Taamak oqarpoq sulisut sinnerlugit royal arctic line-p siulersuisuini ilaasortaq Efa Tittussen. Annilaangassutissaqanngitsulli Pilersuisup pisortaanera oqarpoq.
-Ukiortaaq aallarnerfigalugu allannguiniarnermi pilersaarutit tusatsiagaanartigut tusartarpagut, sulisut sinnerlugit Royal Arctic Line-p siulersuisuini ilaasortaq Efa Tittussen oqarpoq. Taamaammat sulisut toqqissisimanngitsut maluginiarlugu oqarpoq, qanoq pilersaaruteqartoqarnersoq iluamik ilisimaneqanngimmat, aamma sulisut 50-it atorfissaaruteriaanaasut ilanngullugu saqqummiunneqarmat.
-Radiukut saqqummiunneqartartut kisiisa malinnaaffigaagut, taamatut inissisimalluni erloqinarpoq, sulisut paasiniaagaangata iluamik nassuiaatissaqarneq ajoratta, Evfa Tittussen oqarpoq.
Ernumassutissaqanngitsulli Pilersuisup direktøria Gerhardt Petersen oqarpoq.
- 2005-mi angallatit nunaqarfinnut nioqqutissanik assartuinermi atorneqartut Angaju, Aqqalu, Anguteq Ittuk taavalu Pajuttaat ingerlaanassapput, tamatumalu kingorna angallatinik nunanit allanit pigineqartunit taarserneqassapput pisoqalimmata. Taamanikussarlu sulisunik soraarsitsisoqarnavianngilaq, sulisut sungiussisimasut pigiinarneqartariaqarmata, Gerhardt Petersen oqarpoq.
Angallatilli 2006-mi taarserneqartariaqalissapput pisoqalimmata. Angallatinillu nunanit allaneersunik attartortoqalerpat sulisorisat pigineqaanarnissaat sulissutigineqassasoq KNI-p pisortaanera oqarpoq.
