Raajartassat amerlanerunissaat KNAPK-mit kissaatigineqarpoq

- Taamaammat sinerissami raajarniat eqqarsaatigalugit isumaqarpunga 100.000 tonsinik TAC-nik raajartassiissoqarpat tulluarnerussasoq, Henrik Sandgreen oqarpoq.

Raajartassat aappaagumut innersuussutigineqartut Pinngortitaleriffimmit qaffanneqarnerat KNAPK-mit qujarunneqarput.

Biologit siorna innersuussutaat 60.000 tonsiupput raajallu amerleriarsimanerat pissutigalugu  aappaagumut innersuussutigineqartut  30.000 tonsinik amerlineqarnissaat naleqqutuusoq Pinngortitaleriffimmit oqaatigineqarpoq.

Raajat amerleriarsimanerat pinngortitaleriffmmi biologit misissuinneranni takussutissaqarmat, raajartassat 90.000 tonsinut innersuussinissaq Pinngortitaleriffimmit  naleqquttutut isigineqarpoq.

Aamma atuaruk Raajat 90.000 tonsit 2016-imi aalisarneqassasut inassutaavoq

Raajartassat biologiit innersuussutigisaannit  Naalakkersuisut amerlanerusunik raajartassiisinnaapput,  taamaakkaluartoq innersuussutigineqartut qaffanneqarsimanerat KNAPK-mit qujarunneqarput.

- Soorunami uani innersuussutigineqarnertut annertuseriarnerat tamanut qutsunnartuupput ingammik sinerissap qanittuani raajarniartartut eqqarsaatigalugit, Sandgreen oqarpoq.

Raajartassat amerlineqarpata tamanna  aalisartunut aningaasarsiornikkut iluaqutaanissa KNAPK-mit qularutigineqanngilaq aamma raajat akii qaffakkiartormata.

- Qularutissaanngilaq nunami suliffissuarni aamma annertuumik  pissarsissutaasartut taakkua avammut tunineqarnerannut, taamatullu aalisartut namminneq tulaassuinerminni kiisalu aalisartut akunnerminni isumaqatigiissuteqartarneq ilaatigut ingerlatupilussuanngornikuuvaat, taamaattumik aalisartunut ataasiakkaanut aningaasarsiornikkut annertuumik iluaqusiimaartut, KNAPK-ip siulitaasua Henrik Sandgreen taama oqarpoq.

Raajartassat aappaagumut qaffanneqarnissaannik biologit innersuussinerat sulisitsisut peqatigiiffiannit GE-mit  tusarluarnartutut taaneqarpoq.

- Innersuussutigineqartartut aamma raajartassiissutigineqartartut ukiuni kingullerni arfineq marlunni ikiliartuinnavissimappput.

Aamma atuaruk Raajat akisunerulissapput

Taamaattumik  ukiup tullianut innersuussutigineqartut 50 procentingajannik qaffanneqarnerat tusarluarnarpoq, Sulisitsisut Peqatigiffianni  GE-mi siunnersorti Bent Sørensen oqarpoq.  Aalisarnermut Naalakkersuisoq Karl Kristian Kruse biologit aappaagu raajartassanik innersuussutaat pillugu oqaaseqartinniarneqaraluarpoq taannali ulloq naallugu ataatsimiimmat oqaaseqartinneqarsinaasimanngilaq.