KNAPK: RG namminersortunngortinneqarli

Taama oqarpoq Aalisartut Piniartullu Kattuffianni, KNAPK-mi siulittaasoq Henrik Sandgreen, tusagassiortunik politikerinillu ualeq manna pisumi katersortitsinermini.
 
- Tassa aalisartut sulisartullu kalaallit Nunatsinnilu najugaqavissut taakkuupput aalisakkerivinnik tigusisariaqartut. Tamannalu misilittagaqarfigineqareerpoq aamma takusareerparput ajornanngivissumik ingerlatisoqarsinnaalluartoq. Tamanna iluatsissinnaavoq aporfissalersuinertaqanngitsumik politikkikkut ingerlatsinermi, taamaalilluni ajornannginnerulissaaq aalisakkerivimmik ingerlatsisinnaaneq, tassa tamanna angorusutarput, KNAPK-p siulittaasua, Henrik Sandgreen oqarpoq.
 
Taassuma aamma oqaatigaa, tunitsiviit tunisassiorfiillu Royal Greenland A/S-imiit namminersortunngorniartunut tuninerinut atatillugu Royal Greenland A/S-ip piumasaqaatitalersuisarnera atorunnaarsinneqassammat tamannalu pisisussanut inuiaqatigiinnullu iluaqutaaliinnassasoq oqaatigalugu.

AAMMA ATUARUK KNAPK inuiaqatigiinnut pingaaruteqartussanik nalunaaruteqarniarluni tusagassiortunik katersortitsilersoq

Henrik Sandgreenip Royal Greenland A/S-ip ullumikkut iliuuserisartagaa ima oqaatigaa.
 
- Aalisartut Royal Greenlandimut tunisinerini qularnaarniarneqartarpoq, aalisartut namminneq soqutigaat malillugit tunisisoqartassanngitsoq aamma Royal Greenlandip nammineq tuniartagaannik aalisartut namminneq tuniniaassanngitsut. Soorunami pissutsit taamaatsillugit iluatsittoqarsinnaanngilaq. Tassa Royal Greenlandip taama pissuseqarnerata atorunnaarsinneqarnissaa maannakkorpiaq piumasarisarput.
 
Royal Greenland A/S-ip namminersortunngortinneqarnerani iluaqutaasinnaasut KNAPK-p siulittaasuata ima oqaatigai.
 
- Soorunami tunitsivinnik tigusisut avammullu niuersinnaanermik akuersissuteqarunik killilersorneqaratik avammut niuernermik pitsaasumik ingerlataqalersinnaapput. Tassa iluaqutissartaa, Aalisartut Piniartullu Kattuffianni KNAPK-mi siulittaasoq, Henrik Sandgreen taama oqarpoq.